Galicia recibirá 19,7 millóns do Goberno central para financiar a dependencia

Galicia recibirá un total de 19,7 millóns de euros para financiar a dependencia, no marco da distribución de 283 millóns aprobada este martes polo Consello de Ministros.

De acordo con esta repartición, segundo informa a Delegación do Goberno, transfírense en concreto case 19,73 millóns á Xunta, un 6,97% do total. A Delegación do Goberno reivindica que esta contía se corresponde co denominado 'Nivel Acordado', "unha partida recortada en 2012". "O Goberno cumpre así un dos principais compromisos do acordo de coalición progresista", resalta.

Destaca tamén que a Xunta de Galicia é a sexta administración autonómica con máis fondos deste capítulo, e que supera a comunidades como Castela-A Mancha, Aragón, Asturias, Baleares e Canarias, entre outras.

"Xunto á recuperación do Nivel Acordado, o Goberno tamén elevou unha media do 17% as contías do Nivel Mínimo, isto é, as transferencias que o Estado fai ás comunidades autónomas por cada persoa dependente atendida", agrega.

Asegura que estes fondos "darán cumprimento ao Plan de Choque en Dependencia, que busca tres obxectivos: reducir as listas de espera, mellorar as condicións e a calidade dos servizos profesionais para a dependencia e mellorar as prestacións financiadas que reciben as persoas dependentes".

E conclúe que para 2022 e 2023 "o Goberno comprométese a levar aos presupostos incrementos similares e acumulativos para conseguir o obxectivo fixado no Acordo de Goberno de reducir a lista de espera polo menos un 75%, ademais de mellorar as prestacións que reciben as persoas dependentes e as condicións laborais dos profesionais".