Por E.P. | SANTIAGO DE COMPOSTELA | 31/03/2021 | Actualizada ás 17:06
A portavoz da Marea Atlántica e presidenta do Bordo Litoral, María García, subliñou que o "porto non está en venda" e avanzou que esixirán no pleno municipal que se impida a súa privatización. Así o sinalou nunha rolda de prensa celebrada este mércores ante a posibilidade da venda dos terreos de San Diego para a construción de vivendas, un plan que considera algo propio dunha "quenlla inmobiliaria" e fronte ao que insta a que "o porto siga sendo un porto".
A comisión do Bordo Litoral reuniuse este mércores para debater sobre o futuro encontro que manterán o 9 de abril Concello, Xunta e Estado para decidir o futuro de San Diego.
MOCIÓN NO PLENO
Pola súa banda, na inauguración da nova exposición do acuario, a alcaldesa da Coruña, Inés Rey, non quixo valorar o futuro dos terreos e lembrou que a reunión sobre este asunto foi convocada o pasado 23 de febreiro entre todas as administracións.
Con todo, María García advertiu que a súa formación levará ao pleno unha moción para facer que o goberno de Inés Rey "fale con claridade" e exprese "o rexeitamento á venda e privatización dos terreos". A portavoz da Marea asegurou que "non é necesario privatizar" e que estes espazos "poden ser usados polos cidadáns". Así, puxo como exemplo a dársena de Transatlánticos e avogou pola "vontade política" para levar isto a cabo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.