Por Europa Press / Redacción | SANTIAGO DE COMPOSTELA | 05/04/2021 | Actualizada ás 13:00
Case 6.000 persoas visitaron a Praia das Catedrais, no municipio de Ribadeo, entre o Xoves Santo e o sábado desta semana Santa que foi "tranquila e activa", tal e como a definiu este luns a conselleira de Medio Ambiente, Territorio e Vivenda da Xunta, Anxos Vázquez.
Durante unha visita a este emblemático areal, Vázquez constatou que non se produciu "ningún tipo de incidencia" durante as vacacións no lugar, que conta "con persoal especializado para facer visitas guiadas", o que inclúe a biólogos e axentes ambientais "que instrúen e ao mesmo tempo dan a coñecer que hai que seguir cumprindo a normativa desde o punto de vista sanitario".
"Estamos de parabén por ter este paraíso natural e porque o comportamento dos galegos foi fenomenal", celebrou a conselleira de Medio Ambiente. Anxos Vázquez aférrase a que a Praia dás Catedrais é "un destino seguro, onde aqueles lugares que poden entrañar un perigo están perfectamente sinalizados". "Nunca debemos saltarnos esa sinalización. Unha foto pode ser moi bonita, pero unha vida o é moito máis. Temos que lembrar que é un ámbito natural", razoou.
Así, sobre as expectativas de cara ao verán, Vázquez augurou que será "marabilloso, pero tamén para toda a zona da Mariña, porque é un atractivo turístico que dinamiza a zona". "Seguiremos pondo en valor o turismo de natureza porque é fundamental", comprometeu a conselleira.
LEI DE CAMBIO CLIMÁTICO
Por outra banda, a conselleira de Medio Ambiente aproveitou esta visita para acusar o Goberno central, concretamente ao Ministerio para a Transición Ecolóxica, de tentar coar "pola porta de atrás e ocultando datos" unha nova lexislación en materia costeira coa Lei de Cambio Climático que pronto concluirá a súa tramitación no Congreso.
"Unha norma destas características (a de Costas) nunca pode ser modificada a través da lei. É o suficientemente importante, con 74 concellos con costa e 89 afectados por dominio público marítimo-terrestre en Galicia. Iso entraña unha gran cantidade de actividade, porque concentra moita poboación, pero porque tamén se concentran gran número de industrias e servizos", advertiu.
Por iso, Vázquez fixo un chamamento "á participación" para modificar a Lei de Cambio Climático e que non se faga "pola porta de atrás, ocultando datos ou facendo interpretacións que son erróneas xuridicamente". "Iso non conduce a nada", afeou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.