Xa está aberta a V bolsa Nacho Mirás para proxectos xornalísticos
Esta iniciativa do Colexio de Xornalistas, patrocinada por Abanca, conta cunha dotación de 6.000 euros
Por Europa Press / Redacción | Compostela | 05/04/2021 | Actualizada ás 14:26
A V edición da bolsa Nacho Mirás, destinada a proxectos xornalísticos para novos titulados en Xornalismo e Comunicación Audiovisual, abre o prazo de presentación de traballos ata o 31 de maio.
A Facultade de Ciencias da Comunicación da Universidade de Santiago de Compostela (USC) acolleu este luns a presentación desta bolsa, que está organizada polo Colexio Profesional de Xornalistas de Galicia e patrocinada por Abanca.
Esta bolsa conta cunha dotación de 6.000 euros. As bases para participar están dispoñibles na web do Colexio de Xornalistas. O decano de Ciencias da Comunicación, Xosé Ramón Pousa, destacou que a Bolsa Nacho Mirás xa é un "proxecto consolidado" despois de seis anos, o cal serve como "unha xanela aberta" nun "escenario tan complexo" como o actual.
Igualmente, Pousa acordouse de Mirás: "Lamentablemente, os alumnos aos que lles presentamos a bolsa xa non tiveron a posibilidade de coñecelo, pero queda o seu traballo". A continuación, a vicedecana segunda do Colexio de Xornalistas, Belén Regueira, fixo lectura de varios textos de Nacho Mirás para lembrar que "sempre estaba a mirar cara á xente nova". "Sabía que tiñamos que buscar máis puntos de encontro", afirmou.
Pola súa banda, o director de Zona de Abanca en Santiago, Ramón Mariño Pérez, subliñou que, "nun ano tan difícil como este, é máis importante, aínda se cabe, fomentar este tipo de iniciativas".
PROXECTO GAÑADOR A PASADA EDICIÓN
No acto deste luns, tamén se presentou a iniciativa gañadora da quinta edición desta bolsa, chamada 'éDeporte', detrás da cal están: César Fieiras Ceide, Paula Avendaño Liste, Lucía Cancela Martínez e Alejandro Gómez Fernández.
