Por E.P. | SANTIAGO DE COMPOSTELA | 05/04/2021 | Actualizada ás 17:40
O Diario Oficial de Galicia (DOG) publica este luns a convocatoria dos Premios Artesanía de Galicia 2021, cos que a Xunta busca recoñecer o talento e a traxectoria dos artesáns galegos, así como de impulsar o relevo xeracional no sector.
Segundo informou a Vicepresidencia segunda e Consellería de Economía nun comunicado, como en anos anteriores, dividiranse nas categorías Premio Artesanía de Galicia, Premio Traxectoria e Premio Bolsa Eloy Xesto.
O departamento que dirixe Francisco Conde sinalou que estes galardóns contribúen a divulgar os oficios artesanais, potenciar a creatividade dos profesionais, incentivar os novos talentos en Artesanía de Galicia, promover o relevo xeracional e apostar pola introdución da innovación e do deseño nos procesos de produción. O prazo de presentación de candidaturas estará aberto desde o 15 ata o 29 de outubro deste ano.
En concreto, o Premio Artesanía de Galicia, dotado con 9.000 euros, está dirixido a talleres artesáns inscritos no Rexistro Xeral de Artesanía de Galicia. Premiarase a obra que represente as liñas desexadas para unha artesanía competitiva no mercado actual como son o deseño, a adaptación ou a conservación das técnicas e valores tradicionais máis característicos da nosa artesanía, a incorporación ás tendencias actuais, a innovación e a boa calidade da obra.
Pola súa banda, o Premio Traxectoria ten carácter honorífico e trátase dun galardón outorgado polo propio sector para recoñecer a traxectoria profesional consolidada dun profesional da artesanía galega, a súa contribución á posta en valor e á promoción da nosa artesanía, a calidade do seu traballo así como o seu compromiso coa divulgación e coa transmisión pedagóxica dos principais valores positivos no campo da nosa artesanía.
Está dirixido a artesáns en activo ou retirados que estean ou estiveran inscritos no Rexistro Xeral de Artesanía de Galicia e cunha actividade mínima e demostrable no sector de 20 anos. As candidaturas poderanas presentar talleres rexistrados, asociacións profesionais de artesáns de Galicia ou outras entidades públicas ou persoais.
A Xunta destacou que os Premios Artesanía de Galicia fan especial fincapé na incorporación dos artesáns máis novos a través do apoio á súa formación especializada co Premio Bolsa Eloy Xesto, que está dotado con 4.000 euros para investir nun centro de formación de prestixio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.