Por E.P. | SANTIAGO DE COMPOSTELA | 07/04/2021 | Actualizada ás 13:57
A conselleira do Mar, Rosa Quintana, enxalzou este mércores o "importante labor" que realizan os grupos de acción local do sector pesqueiro (GALP) na dinamización das zonas costeiras e na conservación do patrimonio e da cultura relacionada co mar en Galicia, así como a súa capacidade de adaptación ás dificultades derivadas da alerta sanitaria polo coronavirus.
Fíxoo durante a presentación telemática do campionato REMA 360º, unha iniciativa lúdica e divulgativa impulsada polos GALP a través do proxecto de cooperación Pasaporte REMA, co que máis de 1.100 alumnos de 1º e 2º de ESO de máis de 40 centros educativos galegos aprenderán cousas sobre o mundo do mar e a súa cultura.
Na primeira parte do campionato, que se desenvolverá totalmente en liña, os alumnos participantes visitarán de maneira virtual os contidos dos 27 museos incluídos na Rede de Espazos Museísticos Atlánticos (REMA) e irán superando distintas probas e retos cos que irán acumulando puntos.
Nese percorrido polos museos a través de contidos de texto e audiovisuais -no que terán que superar probas en cada un deles para poder pasar ao seguinte-, irán recompilando información e obtendo distintos obxectos/tesouros que lle servirán para resolver o reto final desta primeira fase.
SEGUNDA FASE
Os cinco centros educativos que obteñan a mellor puntuación nesta primeira fase, pasarán á segunda, que se celebrará despois do verán de maneira presencial e que consistirá nun escape-room físico con retos a superar relacionados co mundo marítimo-pesqueiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.