A venda de vehículos de ocasión cae case un 3% en Galicia no primeiro trimestre
Esta caída contrasta co aumento da media a nivel estatal.
Por E.P. | SANTIAGO DE COMPOSTELA | 08/04/2021 | Actualizada ás 10:48
Galicia rexistra a venda de 25.730 turismos de ocasión no primeiro trimestre do ano, o que supón un descenso do 2,87% respecto ao mesmo período de 2019, segundo datos da Asociación Nacional de Comerciantes de Vehículos (Ancove). Esta caída contrasta co incremento da media española no primeiro trimestre, que é dun 1,1%, con 454.118 vehículos vendidos.
No tocante ao mes de marzo, en Galicia transferíronse 10.222 turismo de ocasión, o que supón un repunte do 56%, aínda que por baixo da media do estado (+65%). A provincia galega con mellor comportamento foi Lugo, cun 58,2% de subida.
Ancove instou o Goberno a que inclúa os eléctricos de ocasión no próximo Plan Moves III de incentivos ao despregamento do vehículo eléctrico. Neste sentido, a asociación destacou que estas axudas son "especialmente interesantes" nos coches eléctricos xa que, a pesar da idade, "seguen sendo neutros para o medio ambiente".
Esta petición realízase un día antes de que a ministra para a Transición Ecolóxica e o Reto Demográfico, Teresa Ribera, presente o novo Plan Moves III de axudas aos modelos 'cero emisións', que estará dotado de polo menos 400 millóns de euros.
"Pedimos ao Goberno que inclúa axudas para os compradores que, non podendo custear un eléctrico de primeira man, aínda moi caros, poidan optar por un de ocasión, moito máis alcanzable", indicou o presidente de Ancove, Elías Iglesias.
