Por E.P. | VIGO | 08/04/2021 | Actualizada ás 17:32
O Consello Xeral do Poder Xudicial (CGPJ) emitiu informe favorable á implantación do servizo de gardas de 24 horas nos partidos xudiciais da Coruña e Vigo, aínda que o condicionou a que a Xunta e o Ministerio de Justicia asuman o seu custo económico.
Segundo comunicou o Tribunal Superior de Xustiza de Galicia (TSXG), este infome responde á petición dos xuíces de instrución de ambas as cidades de modificar as gardas semanais actuais por gardas de 24 horas con quenda rotatorio diario.
A Sala de Goberno do TSXG deu o seu visto e prace á proposta e en 2019 cursou a solicitude do cambio de sistema de gardas ao CGPJ. O organismo estatal, no informe que emitiu leste mesmo xoves, avala a implantación do novo sistema de gardas e sinala que esta medida "melloraría o servizo que se ofrece á cidadanía".
Neste contexto, o TSXG apuntou que o Ministerio de Xustiza "mostrouse conforme coas novas quendas e disposto a asumir o seu custo, pero advertiu de que a autorización quedaría supeditada á dispoñibilidade orzamentaria, unha vez que se proceda á aprobación da próxima Lei de Orzamentos Xerais do Estado".
Pola súa banda, a Xunta, nun informe remitido á CGPJ, manifestou que é "imposible" dispor neste momento dos recursos económicos necesarios para a posta en marcha deste sistema, xa que a crise sanitaria provocou "unha reorientación dos recursos cara á creación de novos órganos xudiciais".
Así, destacou que recentemente se puxeron en marcha tres novos xulgados do social na Coruña, Lugo e Vigo, que supoñen "un gasto superior ao que suporía para esta comunidade as gardas de 24 horas de ambas as cidades". En todo caso, a Administración autonómica apuntou que "no futuro podería considerar a súa implementación".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.