Por Galicia Confidencial | SANTIAGO DE COMPOSTELA | 13/04/2021 | Actualizada ás 14:32
Os cambios no calendario escolar que vén de anunciar a Consellería de Educación comezan a xerar queixas entre a comunidade educativa. Anpasgalegas amosa o seu malestar a través dun comunicado a raíz deste posible adiamento dos exames de recuperación de ESO, 1º de bacharelato e de FP Básica a partir do curso 2021-2022 de setembro a xuño. "É un puro disparate, un desatino sen lóxica que só serve para a comodidade administrativa dos centros educativos, e para incidir aínda máis no abandono daquel alumnado que precise máis atención e máis recursos", critica Anpasgalegas.
A organización avala a "necesidade de garantir un período de vacacións innegociable", mais consideran que ese tempo "non pode transcorrerr dende o 22 de xuño ata o 15 de setembro": "Iso non son vacacións, é un deserto insuperable na autonomía do alumnado con dificultades, e un descanso innecesario para aquelas que non as teñen", sentenzan.
Dende Anpasgalegas esixen que se "abra o debate" sobre outro calendario diferente, "apartado das festividades relixiosas, que teña unha organización estritamente pedagóxica e non laboral". Así mesmo, piden que este sexa consensuado coas familias e co propio alumnado de cursos superiores. "Nós tamén queremos cambiar o calendario escolar, pero con calma, con sentido, coa nosa presenza e a de expertos e con absolutamente todas as opcións abertas". Pola contra, din, un calendario escolar negociado como un "asunto puramente laboral" que deixa de lado a toda a comunidade educativo terá a Anpasgalegas "frontalmente en contra".
"As familias galegas non imos permitir que se lles retire ás nosas fillas e fillos un dereito, o da segunda convocatoria, que marca a diferenza entre superar ou non superar un curso académico, sen falar sequera do que esta mesma mocidade recibe a cambio, en que condicións o recibe, e como se ve compensada e apoiada no seu dereito á educación", rematan o comunicado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.