Rebaixan a petición de pena para unha psicóloga acusada de estafar a un cliente por unhas xestións legais

A terapeuta acusada de estafar 1.200 euros a un cliente pola realización dunhas xestións legais para unha demanda contra o Sergas que nunca chegou a celebrarse defendeu que os traballos chegaron a iniciarse pero interrompéronse porque a suposta vítima interpuxo a denuncia antes de que concluísen as tarefas de estudo do caso.

En todo caso, os máis de 1.000 euros solicitados para tarefas legais foron devoltos á suposta vítima, como el mesmo confirmou durante o xuízo celebrado este mércores na sección sexta da Audiencia Provincial da Coruña, con sede en Santiago. Por este motivo, Fiscalía decidiu rebaixar ao mínimo a petición de condena para a procesada, que se enfrontaba inicialmente a unha solicitude dun ano de cárcere por un delito de estafa.

Os xulgados composteláns acolleron este mércores a vista por estes feitos, que se remontan ao ano 2016, cando a procesada comezou a tratar, primeiro nunha clínica e despois na súa consulta particular, ao denunciante.

Este traballaba de fisioterapeuta como persoal temporal do Sergas, pero deixaran de chamalo por "deficiencias" no desenvolvemento das súas tarefas vinculadas aos seus problemas de saúde de carácter psicolóxico. Debido á interrupción das chamadas para traballar no sistema público galego de saúde, a suposta vítima decidiu iniciar os trámites para reclamar ante o Sergas o recoñecemento dunha discapacidade.

No marco da relación profesional, a terapeuta ofreceuse a axudar ao paciente póndoo en contacto cun avogado para preparar a demanda contra a administración galega. Para facer fronte a estes traballos, que segundo o denunciante nunca levaron a cabo, solicitou que lle entregase 1.200 euros.

Na súa versión, a acusada sostivo que as xestións legais si se realizaron pero non chegaron a concretarse porque o paciente decidiu presentar denúnciana antes de que o avogado concluíse o estudo do asunto. Para refrender isto, asegura que existen correos e escritos que acreditan as tarefas desenvolvidas polo letrado e que o diñeiro entregado pola vítima foille devolto na súa totalidade a través doutro despacho de avogados.

Isto último foi recoñecido durante a vista polo propio denunciante, motivo polo cal a Fiscalía reduciu ao mínimo a petición de condena para a terapeuta, tendo en conta que considera emendado o prexuízo económico causado.Con todo, o Ministerio Público non entende a devolución do diñeiro como unha atenuante para a procesada (cuxa defensa pide a libre absolución) xa que non foi ela quen realizou o rembolso.

Xulgados de Santiago, en Fontiñas. EUROPA PRESS - Arquivo