Hostaleiros piden á Xunta que non "discrimine" os bares na ampliación de horarios

Acollen con "satisfacción" o anuncio de que os restaurantes poderán servir ceas ata as 23,00 horas, pero mostran a súa preocupación porque non se contempla a ampliación para os bares.

Por Europa Press / Redacción | Santiago de Compostela | 14/04/2021 | Actualizada ás 20:13

Comparte esta noticia

Representantes do sector hostaleiro galego acolleron con "satisfacción" o anuncio de que os restaurantes poderán servir ceas ata as 23,00 horas desde o vindeiro venres, unha ampliación de horario que se establece coa condición de que teñan reserva previa, un rexistro dos comensais e un medidor de CO2 en interiores.

Terrazas da hostalaría
Terrazas da hostalaría | Fonte: Concello de Ames.

Este novo paso na desescalada do plan de hostalaría segura foi anunciado este mércores polo presidente da Xunta, Alberto Núñez Feijóo, durante a rolda de prensa para dar conta dos asuntos tratados na última reunión do comité clínico. A boa evolución de Galicia neste ámbito, explicou, permite avanzar en "máis horarios" e mais actividades.

Esta ampliación de horario, en consonancia co adiamento do toque de queda ás 23,00 horas, afectará, no entanto, só aos locais con licenza de restaurante. Así, os bares continuarán pechando, como ata agora, ás 21,00 horas en todos os concellos galegos nos que permanecen abertos --actualmente todos menos Carballeda de Valdeorras, A Pobra e O Grove--.

Representantes de asociacións de hostalaría de boa parte do territorio galego apuntaron que a "satisfacción" por que se escoitaron as súas demandas en relación á restauración compleméntase, no entanto, con "preocupación" por que se poidan xerar situacións "discriminatorias" --por exemplo-- con "taperías ou bocaterías" e que os bares non vexan ampliado o seu horario.

En todo caso, inciden en que, a pesar das limitacións que afectan a todo o sector (por exemplo na capacidade), a situación dos restaurantes era "peor", dado que vían limitado "ás veces ao 50% a súa actividade" ao practicamente "dar só comidas", polo que era un paso necesario. Tamén insisten, en termos xerais, en manter "as medidas de seguridade e a prudencia", e en que se deixe de sinalase á hostalaría como "culpable" dos contagios.

"O SEGUINTE PASO TERÍAN QUE SER Os BARES"

"Estamos satisfeitos por que os restaurantes empecen a dar ceas, porque estaban realmente colgados. Pero o seguinte paso terían que ser a ampliación para os bares", resumiu o presidente da Asociación Provincial de Hostaleiros de Lugo, Cheché Real.

Aínda que "Lugo está moi ben" en termos de incidencia, Real incidiu en que confía en que no conxunto do territorio galego volva mellorar a situación tras a "pequena repunta" que se constata despois de Semana Santa, e se poida continuar avanzando na "normalidade".

Con "bastante satisfacción" tamén acolleu o anuncio posterior ao comité clínico César Ballesteros, presidente dos hostaleiros da provincia de Pontevedra. "Levamos tempo coa demanda das ceas, xa de antes de Semana Santa, aínda que se apostou por ser conservadores por prudencia", reflexionou.

Pendente queda a demanda da ampliación do horario nos bares para "compasar a situación" ao cambio horario. "Pero hai moita diferenza para un restaurante entre abrir só ao mediodía ou tamén pola noite. E para un bar pechar ás 21,00 ou ás 21,30 horas tampouco é unha diferenza substancial", remarcou.

Neste sentido, apostou pola "prudencia" e evitar "bandazos" ata poder chegar, cando sexa posible, á reapertura tamén dos establecementos de lecer nocturno. Ballesteros ve posible dar este paso cando se avance na inmunización, con ferramentas como "o certificado de vacinación ou unha PCR recente". "Mesmo podería ser un aliciente para que a xente nova vacínese", apostilou.

"Nós queremos que quede ben claro que non somos culpables de nada. Que facemos os investimentos que sexa preciso para garantir a seguridade, pero que nos establecementos hai un control que ás veces non hai nos domicilios particulares. E cremos que o comité científico está a darse conta", resolveu.

"DISCRIMINACIÓN"

Daniel Lorenzo, de Hostaleiros Empresarios de Pontevedra (Hoempo), confesou "decepción", xa que aínda que recoñece un avance para os restaurantes considera que "non é do todo xusto". Á espera das condicións que concrete o Diario Oficial de Galicia (DOG), avisa de que "se unha bocatería ou tapería non pode traballar sería bastante discriminatorio".

"Tampouco entendo que se poida ir tomar unha copa a un restaurante pero non a un bar", reflexionou, antes de mostrar preocupación pola "carga de traballo" que se vai acumular na restauración --augura-- e a que se poida "amontoar xente", causando un novo "prexuízo" ao sector.

Así mesmo, incidiu en que "non hai palabras para describir o que sofre o lecer nocturno e os seus traballadores", instando as administracións a "buscar solucións.

Finalmente, Avelino Martínez, socio da Asociación Hostalaría Compostela, trasladou que é "positivo" para os restaurantes a ampliación horaria e recoñeceu que aos bares "nesta ocasión non se lles facilita a cousa".

En todo caso, mostrouse partidario de que as decisións, sexan as que sexan, se tomen "de forma paulatina" e evitar "o exceso de confianza" que dea lugar a "retrocesos". "Non queremos que haxa avances e retrocesos, hai que garantir a seguridade e evitar os excesos de confianza", resolveu.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta