Piden crear un deparmento de xénero nos medios galegos para evitar "a difusión de contidos machistas"

Séguense deixando sentir os ecos da polémica do programa Land Rober. Unha semana despois de que o presentador estrela da CRTVG fora acusado de “machista” por confrontar a unha rapaza cun ex-mozo controlador, a asociación Xornalistas Galegas vén de urxir á creación dun departamento de xénero nos medios de comunicación de Galicia. A asociación incide na “necesidade inmediata” dunha figura “transversal” que tería por obxectivo “evitar a publicación de contidos machistas, sexistas ou que banalicen a violencia de xénero”.

A iniciativa de Xornalistas Galegas, explican, chega ante a preocupación da plataforma pola “frecuente propagación de contidos e pezas informativas sen perspectiva feminista nos medios galegos”, unha circunstancia que ven de “maior gravidade” no caso da corporación pública públicos, xa que esta, subliñan, “debería servir de exemplo e ser pioneiros na integración dunha figura que vele pola perspectiva de xénero de xeito continuado e rigoroso”

No último ano, Xornalistas Galegas denunciou a través da súa canle de Twitter “decenas” de publicacións en medios galegos e estatais que dende a plataforma foron vistos como “carentes de perspectiva de xénero”, máxime tendo en conta a “obriga legal por parte das persoas profesionais e responsables dos medios de promover a igualdade entre homes e mulleres”. 

Neste contexto, o colectivo apunta que vén de impulsar ante o Parlamento de Galicia unha iniciativa para garantir o cumprimento mediático das leis de  igualdade e violencia de xénero, e solicitou á Secretaría Xeral de Igualdade o reforzo de mecanismos que garantan o compromiso dos medios coa perspectiva feminista. A inclusión de voces expertas, tanto nas tertulias como á hora de buscar fontes informativas, é outra das medidas nas que incide a plataforma para “garantir a igualdade e a perspectiva de xénero nos medios de comunicación”.