O PPdeG culpa a Pontón de que un "carvernícola machista" continúe á fronte da Deputación de Lugo

O secretario xeral do PPdeG, Miguel Tellado, asegurou que a portavoz nacional do BNG, Ana Pontón, é "a principal responsable" de manter á fronte da Deputación de Lugo ao socialista José Tomé, ao que cualificou de "cavernícola", "machista" e "agresor" polas súas palabras sobre a vestimenta da líder popular na provincia, Elena Candia. Con todo, evitou criticar as declaracións do presentador Roberto Vilar, do Land Rober da TVG, que tamén protagonizou unha escena machista neste programa

Na súa rolda de prensa habitual dos venres, o número dous do PPdeG asegurou que se Tomei segue no seu cargo é polo "apoio explícito" do Bloque, que goberna a institución en coalición co PSOE pero que na última semana tamén criticou as polémicas declaracións do presidente sobre Candia.

Neste contexto, Tellado aproveitou para agradecer "todas as mostras de apoio" recibidas pola presidenta do PP lucense e para advertir que, aínda que está "moi ben a solidariedade", non acepta "leccións de feminismo" dos nacionalistas.

"Non aceptamos leccións de feminismo dese BNG que se solidariza coa muller insultada pero, ao mesmo tempo, mantén ao agresor, ao insultador, a un machista á fronte da Deputación de Lugo. Por tanto, fraco compromiso co feminismo o que practica o BNG de Ana Pontón", sentenciou.

O secretario xeral do PPdeG, Miguel Tellado, en rolda de prensa.. PPDEG | Fonte: Europa Press

Así, Tellado denunciou que exista un "feminismo de dobre grao" nos partidos da esquerda: "Cando se produce unha conduta machista por parte dun membro do PP é gravísimo, pero cando o protagoniza un responsable da esquerda é cando chegan as medias tintas".