Por E.P. | SANTIAGO DE COMPOSTELA | 16/04/2021 | Actualizada ás 17:10
O novo delegado do Goberno, José Miñones, reunirase o vindeiro martes 20 de abril en Santiago co presidente da Xunta, Alberto Núñez Feijóo. O encontro está previsto, segundo as fontes consultadas por Europa Press, para as 12,30 horas no complexo administrativo de San Caetano.
Este primeiro encontro institucional entre ambos os mandatarios producirase a semana próxima, pero este venres o secretario xeral do PPdeG, Miguel Tellado, aproveitou unha rolda de prensa para trasladar a Miñones "os deberes pendentes" coa Comunidade: o recurso contra a reforma da lei de saúde, a lei de cambio climático, "o desmantelamento" da industria galega, o "abandono" do naval ou "o ataque orzamentario e a inxusta repartición de fondos".
No caso da lei de cambio climático, Tellado advertiu que "non se pode facer propaganda ecoloxista á conta de desmantelar a industria costeira de Galicia" e en clave industrial apuntou que Alcoa, Siemens-Gamesa, Ferroatlántica, Alu Ibérica e agora Ence "foron pechadas ou están en vías de irse da autonomía".
En resumo, remarcou que se trata de cinco "tarefas fundamentais" nas que o novo delegado poderá demostrar "se traballa para o PSOE ou para Galicia" e incidiu en que nelas "fracasou por incomparecencia" o seu antecesor no cargo, Javier Losada.
De feito, o secretario xeral dos populares galegos situou a Losada como "o peor delegado que se lembra" na Comunidade, por estar "moito máis preocupado por aplaudir a Pedro Sánchez e de pór a Delegación ao servizo do PSOE que de traballar polos galegos".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.