A Deputación da Coruña reparte entre 19 concellos case 250.000 euros para contratar especialistas en igualdade
"Para nós é fundamental que os servizos teñan persoal técnico especializado para traballar pola igualdade e a eliminación da violencia machista" declarou a deputada María Muíño.
Por E.P. | SANTIAGO DE COMPOSTELA | 21/04/2021 | Actualizada ás 19:55
A Deputación da Coruña repartiu case 250.000 euros entre 19 municipios da provincia para a contratación de persoal técnico na área de igualdade. Os concellos beneficiarios son A Laracha, A Pobra, As Pontes, Betanzos, Boimorto, Brión, Cabanas , Camariñas, Coirós, Dodro, Fene, Malpica de Bergantiños, Melide, Moeche, Rianxo, Rois, San Sadurniño, Tordoia e Trazo, segundo detalla o goberno provincial.
Nun comunicado, a deputada da área de Igualdade, María Muíño, resaltou o interese espertado entre os executivos locais para obter estes apoios, que permitirán o desenvolvemento das áreas de igualdade e contribuír así a eliminar a violencia machista. Como mostra deste interese, Muíño sinalou que se pasou de dous beneficiarios aos 19 desta convocatoria, orientada a municipios de menos de 20.000 habitantes.
"Para nós é fundamental que os servizos teñan persoal técnico especializado para traballar pola igualdade e a eliminación da violencia machista e, entre todos e todas, construír unha rede de municipios que colaboren nun obxectivo que ten que comprometer ás institucións e á sociedade enteira", incidiu a deputada.
