Mobilización de persoal da limpeza na Coruña en demanda dun "convenio digno"
Trátase dunhas mobilizacións convocadas por CIG, CCOO e UGT, centrais que puxeron en cuestión uns servizos mínimos, ao seu xuízo, "abusivos", de entre o 70 e o 100%.
Por E.P. | A CORUÑA | 22/04/2021 | Actualizada ás 17:17
Traballadoras e traballadores do sector da limpeza da provincia da Coruña mobilizáronse este xoves durante a xornada de folga convocada en demanda dun "convenio xusto".
Fixérono portando fregonas e cun percorrido que, no caso da Coruña, incluíu unha marcha de vehículos e a pé con percorrido por distintos establecementos que teñen contratados o servizo de limpeza e ante sedes de diferentes empresas que o prestan.
Trátase dunhas mobilizacións convocadas por CIG, CCOO e UGT, centrais que puxeron en cuestión uns servizos mínimos, ao seu xuízo, "abusivos", de entre o 70 e o 100%, segundo apuntaron. Isto fixo, engadiron, "que das 10.000 persoas afectadas o convenio só unhas 1.000" poidan exercer o dereito á folga.
En Santiago, segundo informou a CIG, a xornada comezou cun grupo de coches conformando un piquete móbil no polígono do Tambre, ademais de concentracións ante centros comerciais e cun percorrido por distintas rúas, do mesmo xeito que A Coruña ou Ferrol.
Para Paulo Rubido, representante da CIG na mesa de negociación, non se está ante unha patronal "que poida xustificar a súa negativa a mellorar as condicións salariais e sociais pola pandemia, senón que viu incrementado o seu volume de negocio polas desinfeccións".
En concreto, as centrais sindicais denuncian que non se ofreza un incremento salarial polo ano pasado e que a proposta sexa de "un 1% para 2021". A iso, suman "un recorte de dereitos en convenio colectivo como a xubilación parcial ou o dereito a incrementar xornada mulleres que na súa inmensa maioría traballan a tempo parcial".
