Por E.P. | A Coruña | 22/04/2021 | Actualizada ás 19:20
A alcaldesa da Coruña, Inés Rey, apelou á "responsabilidade social" de Repsol para o mantemento dos postos de traballo ante o expediente de regulación temporal de emprego (ERTE) anunciado pola empresa e que afectará ao 31% do persoal.
Preguntada sobre a reunión co comité de empresa, trasladou o "apoio incondicional" aos traballadores para "defender a viabilidade da planta".
"Esperamos que ese ERTE sexa levantado canto antes", sentenciou a rexedora, quen incidiu nos "necesarios investimentos que ten que facer Repsol para garantir esa viabilidade". "Para ser máis eficientes, máis sustentables e adaptarnos á nova realidade".
Á súa vez, o comité da refinaría destacou o contido do encontro enmarcada na procura de apoios contra un ERTE que rexeitan e contra o que convocaron unha concentración este venres ante a empresa e o sábado unha manifestación.
Mentres, o deputado do BNG no Congreso Néstor Rego reclamou ao Ministerio de Traballo que investigue as causas alegadas por Repsol para o ERTE e sostén que a información anunciada pola empresa ata o momento "só fai referencia a causas de produción pero, se estas non se acreditan adecuadamente, podería cualificarse como un expediente de regulación de emprego temporal fraudulento".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.