Máis do 25% do profesorado funcionario xubilarase nos próximos anos

Unha porcentaxe superior ao 25% dos funcionarios docentes poderían xubilarse nos próximos anos. Esta é unha das conclusións ás que chega o estudo desenvolvido por CIG-Ensino a partir dos datos facilitados pola Consellería de Educación. Tendo en conta a marxe de erro que provocan as xubilacións anticipadas, a CIG indica que nos próximos cinco anos as taxas de reposición poderían ser superiores a 5.000 docentes, "con cifras anuais, polo tanto, similares ás destes últimos anos". 

Este "importante relevo xeracional" producirase, sobre todo, no corpo de mestres e especialidades con máis docentes de Educación Secundaria, posto que son as que "copan os primeiros postos de profesorado entre 55 e 65 anos". "Destaca especialmente a cifra de 1.316 de Primaria así como as 488 de Infantil, 360 de PT ou 249 de Inglés", sinala o estudo do sindicato.

Así mesmo, no corpo de profesorado de secundaria destacan por cifras absolutas aquelas especialidades que superan as 300 profesoras e profesores destas idades: Inglés, con 500 docentes nesa franxa, e Lingua Galega, con 447 próximas xubilacións, son as especialidades que requirirán unha maior demanda de docentes, mais tamén salientan os 355 docentes de Xeografía e Historia ou os 343 mestres de Matemáticas. Porén, dende a CIG indican que as porcentaxes de docentes próximos á xubilación esténdese "case por igual" nas especialidades que imparten docencia na ESO e o Bacharelato e, en cifras relativas, tendo en conta o total de docentes en activo e cada especialidade, son moi elevadas en case todas.

 

No caso das especialidades da Formación Profesional a situación é bastante diferente, de maneira que se evidencia a diferenza entre aquelas especialidades cunha maior implantación e aquelas máis novas e minoritarias.

AS XUBILACIÓNS, UN COLCHÓN INSUFICIENTE

A CIG indica que o alto índice de xubilacións, cunha rotación importante nas listas de interinidades, está a servir en moitas especialidades como "protección fronte ao que podería ter sido unha desfeita para o profesorado interino", ao se manter no bando sindical e na Consellaría o "boicot a incorporar unha cláusula de estabilidade para salvagardar

centos de postos de profesorado interino en risco". Deste xeito, indican que se trata dun "colchón fronte a un ERE masivo, pero insuficiente para parte do profesorado interino".

 

Dende o sindicato demandan, xa que logo, un "cambio na normativa estatal" para a consolidación do persoal interino. "Todas as nosas propostas, centradas nun modelo de acceso diferenciado, foron desatendidas polos diferentes gobernos, antes do PP e agora co PSOE". "Negámonos a sermos cómplices de procesos masivos nos que non se dá solución ao abuso na contratación temporal", sentenzan dende a CIG, que esixe que a próxima negociación comprometida polo ministro Iceta no marco da Función Pública supoña "un salto cualitativo no recoñecemento da fraude polo abuso na temporalidade".