Por E.P. | A CORUÑA | 26/04/2021 | Actualizada ás 18:06
O presidente da Deputación da Coruña, Valentín González Formoso, visitou este luns a sede da Asociación de Pais e Nais e Nenos con Parálise Cerebral (Aspace), no municipio coruñés de Sada, onde informou do financiamento por parte desta entidade da actividade de 215 entidades sociais da provincia, cun investimento de tres millóns.
Acompañado do presidente da entidade, Antolín Rodríguez, da xerente Sonia Ruiz e doutros membros da xunta directiva, visitaron o complexo, que conta con máis de 3.500 metros cadrados nos que se sitúan un centro educativo, un centro de día e servizo de residencia, comedor e atención temperá, que dan servizo a 115 usuarias e usuarios de concellos da área coruñesa.
Na súa visita, Formoso agradeceu o gran labor que realizan os profesionais de Aspace, "unha asociación pioneira no seu ámbito e toda unha referencia na atención integral ás persoas con parálise cerebral en Galicia", incidiu.
OUTRAS AXUDAS
Por outra banda, a Deputación coruñesa apoia este ano con 403.000 euros as actividades e investimentos das entidades asociativas agrarias, labradoras, gandeiras, forestais e asociacións de cazadores da provincia durante o ano 2021.
O Boletín Oficial da Provincia (BOP) anuncia este luns a convocatoria das subvencións para actividades, cun orzamento total de 285.000 euros, que distribuirán axudas entre os 8.000 euros e os 24.000 euros.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.