Por Galicia Confidencial | SANTIAGO DE COMPOSTELA | 27/04/2021 | Actualizada ás 22:15
Varias semanas despois de que o Dígocho Eu de Esther Estévez recibira un premio da CTNL pola súa contribución á “autoestima dos galegofalantes” seguen a xurdir iniciativas audiovisuais na rede que tentar manter viva a lingua galega conservando formas tradicionais en proceso de se perder para sempre.
Tal é o caso da serie ‘Brincadeiras da lingua’, un conxunto de vídeos realizados por Migallas Teatro e que ten como obxectivo “fomentar a práctica” dos ditos tradicionais galegos. En particular, este produto audiovisual focalízase nos ditos infantís, os dirixidos aos máis pequenos, que recompilan e explican nuns vídeos breves que, polo momento, xa chegan á decena.
Segundo explican dende a compañía teatral, afincada en Pontevedra, “cada capítulo está dedicado a un tipo de ditos consonte a súa función: caricias no colo, para xogar coas mans, para abanear e cabalgar, para durmir e espertar, recitados dialogados, para acompañar xogos, para facer bromas, oracións de risas, disparates e trabalinguas”.
En conxunto, explican dende Migallas Teatro, a mostra suma cen brincadeiras, que quedan así recompiladas no audiovisual co obxectivo que axudar a “gozar e transmitir a lingua galega”. Na páxina web www.orellapendella.gal hai outros “centos de ditos” dispoñibles para quen queira consultalos e choutar á aventura de manter viva a fala.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.