Por Europa Press / Redacción | A CORUÑA | 27/04/2021 | Actualizada ás 21:34
A Deputación da Coruña trasladou o seu apoio á plataforma SOS Sanidade Pública nas súas reivindicacións para recuperar o sistema sanitario público galego tras a pandemia da covid-19.
Segundo informa, o presidente da Deputación, Valentín González Formoso, comunicoulle ao presidente de SOS Sanidade Pública, Xosé Divos que o goberno provincial levará ao pleno unha moción de apoio ás demandas da entidade, entre as que figura a recuperación da atención presencial nos centros de saúde.
A plataforma denuncia que a situación actual obrigou a suspender consultas, probas diagnósticas e intervencións cirúrxicas, "obstaculizando a atención necesaria a outras enfermidades que non sexan a covid-19, así como a posibilidade de ofrecer unha boa atención ás persoas afectadas por esta patoloxía".
OUTRAS INICIATIVAS
Por outra banda, o organismo provincial mostrou o seu respaldo ás iniciativas vinculadas ao empoderamiento das mulleres labradoras, nunha reunión coa asociación que agrupa a este colectivo, na que abordaron propostas para avanzar neste ámbito.
Noutra orde de cousas, o Boletín Oficial da Provincia (BOP) publicou a concesión provisional das subvencións para os servizos de socorrismo en concellos do interior da provincia, que financia a Deputación da Coruña con 305.999,75 euros.
Ademais, a institución provincial destina case 123.000 euros para instalar unha nova oficina de turismo no municipio de Padrón. O prazo para presentar ofertas á licitación termina o 13 de maio.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.