Acusan a un empresario de non dar de alta a 10 traballadores na Seguridade Social
No xuízo, o acusado alegou que os traballadores ían figurar como autónomos.
Por E.P. | A CORUÑA | 28/04/2021 | Actualizada ás 13:08
O empresario acusado de non dar de alta na Seguridade Social a dez traballadores alegou no xuízo que se celebra na Audiencia Provincial da Coruña que a súa intención era que figurasen como autónomos facéndose cargo dos gastos.
Fiscalía pide dous anos de cárcere para o procesado por contratar a 10 persoas "sen celebrar contrato de traballo nin ser dados de alta na Seguridade Social ningún deses traballadores". Pola súa banda, a defensa pide a libre absolución. Os feitos remóntanse a setembro de 2015, momento no que se empezaron a realizar as obras de rehabilitación dun edificio na Coruña que pertence a unha sociedade da que é dono o acusado.
Na súa declaración, o home alegou que contratou a unha persoa de confianza para que se encargase da rehabilitación do edificio do que era propiedade da súa sociedade. Este encargouse de buscar aos traballadores que serían dados de alta como autónomos para traballar na obra.
Segundo afirmou o acusado, os traballadores estiveron a facer traballos de provisión de material os días previos, e o día 15 foi dalos de alta como autónomos para empezar a obra, pero nese momento apareceu o inspector de Traballo e Seguridade Social.
Dous dos traballadores da obra corroboraron a versión do acusado. Dixeron que foron contratados por unha terceira persoa e que estiveron a facer provisión de material e outros preparativos os días previos, pero que aínda non empezaran a executar a obra. Doutra banda, tamén afirmaron non asinar ningún documento antes da inspección de traballo, pero confirmaron que o día 15 de setembro entregaron os seus documentos para ser dados de alta como autónomos.
