Feijóo: "Se fomos capaces de detectar ántrax, como non imos ser capaces de detectar metais en envíos postais?"

O presidente da Xunta e líder do PPdeG, Alberto Núñez Feijóo, lamentou este xoves o "espectáculo" que, baixo o seu punto de vista, se deu en Madrid "usando a empresa pública Correos" para "facer unha campaña". "Se fomos capaces de detectar ántrax, como non imos ser capaces de detectar metais en envíos postais de cen gramos ou posterior?", preguntouse.

Feijóo, que foi presidente de Correos na etapa de José María Aznar á fronte do Goberno central, referíase ás cartas ameazantes (con balas) recibidas por dirixentes como o líder de Podemos, Pablo Iglesias, ou o ministro de Interior, Fernado Grande-Marlaska.

Preguntado sobre o papel de Vox na campaña e se considera que, chegado o momento, se o necesita para presidir Madrid, a súa compañeira Isabel Díaz Ayuso debería pactar coa formación de Abascal, o líder do PP galego sorteou a pregunta manifestando a súa convicción de que Ayuso "saberá o que ten que facer e farao", ademais de subliñar que, se é a máis votada, a esquerda pode evitar que teña que pactar con Vox se facilita a súa investidura coa abstención. E a continuación, reflexionou sobre unha campaña que considera "lamentable".

"Tras o que vimos nesta campaña, prefiro que esta sexa unha campaña para non imitar", dixo, antes de aludir ao "movemento populista" no que, baixo o seu punto de vista, "o PSOE acaba de participar". De feito, mostrou a súa contrariedade polo feito de que "unha persoa respectable no ámbito político como Gabilondo faga xogo e traballe con Iglesias para todo este movemento lamentable que se viu nestas semanas".

"O espectáculo que se deu utilizando a empresa pública Correos, sabendo perfectamente que está con capacidade suficiente e cuns escáneres o suficientemente sólidos como para detectar ántrax e que non detecta balas ou obxectos metálicos é algo que necesita unha explicación", dixo o presidente galego.

"Necesita unha explicación. Como é posible deixar á empresa pública Correos nesta situación? Sendo un dos mellores correos de Europa. Lamento profundamente que se utilice Correos para facer unha campaña. É incrible, volvo reiterar. Se fomos capaces de detectar ántrax, como non imos ser capaces de detectar metais nos envíos postais de cen gramos ou posterior?", agregou.

E a continuación, o presidente da Xunta aludiu aos escáneres dos ministerios. "Non me imaxino que me entre unha carta no meu despacho con eses produtos que parece ser que dirixen a outros políticos", apostilou.