Feijóo pide un pacto de Estado para a recuperación industrial de Ferrolterra

O presidente da Xunta de Galicia, Alberto Núñez Feijóo, propuxo un Pacto de Estado para Ferrol que permita a "recuperación e transformación industrial da comarca", e, tras aludir á "crise" que viven varias industrias na Comunidade --como Alcoa ou a térmica das Pontes--, anunciou que dita situación e os fondos europeos Next Generation serán asuntos crave na reunión que este venres terá en Madrid coa vicepresidenta segunda do Goberno, Nadia Calviño.

Feijóo anunciou que, "debido ao problema evidente na comarca de Ferrol", cunha crise industrial e económica, que provocou que "sexa a cidade galega na que máis descende a poboación e a que máis paro rexistra", proporá un pacto de Estado para "abrir diálogo e mobilizar as empresas".

"A Xunta de Galicia non vai dar Ferrol por perdida. Non podemos seguir recréandonos no problema e non tomar decisións", sinalou o presidente do Executivo galego, que asegurou ademais que as decisións tomadas polo Goberno central "diminúen unhas capacidades industriais xa de seu mermadas".

"Ao peche da central térmica das Pontes, súmase a non execución do dique cuberto previsto no Plan Estratéxico de Navantia e a falta de traballo para o estaleiro", indicou Feijóo, que detallou ademais a proposta do Executivo autonómico para a comarca, con tres vías diferenciadas.

En primeiro lugar, abrirase un proceso de diálogo entre os axentes económicos, sociais e os partidos políticos. Mobilizarase tamén a todas as consellerías para que prioricen os investimentos e, por último, reclamarase a implicación de todas as administracións a través do Pacto de Estado que "reúna a Goberno central, Xunta, Deputación da Coruña e concellos".

REUNIÓN CON NADIA CALVIÑO

Doutra banda, o presidente galego confirmou que, na reunión que terá este venres en Madrid coa responsable de asuntos económicos do Goberno, abordarán os proxectos presentados pola comunidade galega para optar aos fondos europeos, unha partida coa que se pretende "impulsar a reactivación económica e renovar o tecido económico e empresarial" de Galicia.

Entre os 354 proxectos presentados en Galicia, recóllense iniciativas "en sectores estratéxicos" como a automoción, a través de AutoAncora, ou o naval, con proxectos como Green Bay; o Polo Aeroespacial de Galicia; e medidas relacionadas co sector Biotech, entre outras.