Aprendendo sobre ‘Froiticultura’ en Verín
O alumnado do “Obradoiro de Froiticultura Mocidade de Verín” visitou o pasado 28 de abril as instalacións do Centro de Desenvolvemento Agrogandeiro do Inorde en Xinzo de Limia.
Por X.M. Fernández | Verín | 01/05/2021 | Actualizada ás 10:00
O obxecto desta visita foi que o alumnado deste obradoiro coñeza os procesos básicos da sistemática de análise de solos, ademais das accións e servizos que o Instituto Ourensán de Desenvolvemento Económico realiza no ámbito do sector primario provincial.
Nesta actividade abordouse a importancia que ten coñecer as necesidades dos cultivos, o respecto e os coidados que o agricultor lle debe dispensar ao solo de cultivo, a determinación e o control de pragas e enfermidades, a problemática dos agricultores de nova incorporación, a transición ecolóxica e a necesaria vinculación entre agricultura e medio natural.
ACTIVIDADES DO INORDE
O Inorde considera que a formación dos novos profesionais é unha liña de traballo esencial, co cal este tipo de iniciativas supoñen unha parte fundamental dos servizos que este organismo presta en apoio ao sector primario da provincia.
