'Ons', 'Nación', 'Xan'... Esta é a programación da Filmoteca de Galicia para maio

A programación de maio da Filmoteca de Galicia centrarase nos galardoados durante os Premios Mestre Mateo deste ano, ademais dos novos ciclos 'Esenciais: Eric Rohmer' e 'Jean-Claude Rousseau: A luz reflectida a través das cousas'. Ademais, continúan exhibíndose outros títulos dentro dos apartados 'Fóra se serie' e 'Desencadres', así como a 'Filmoteca Júnior'.

O 19 de maio proxectarase 'Ons', de Alfonso Zarauza, merecedor de nove recoñecementos nos Mestre Mateo e entre eles o de mellor película. O día 20 exhibirase de novo 'Nación', de Margarita Ledo Andión, premiado como mellor documental.

O sábado 21 será a quenda de 'Xan de Comadres', de Noemí Chantada, e de 'Carne', de Camila Kater, gañadoras como mellor curtametraxe de imaxe real e de animación, respectivamente. Nesta mesma xornada poderá verse a galardoada como mellor webserie, 'Xan', de Lucía Estévez e Miguel Canalejo.

Todas as sesións terán lugar na sala recentemente bautizada co nome de José Sellier, en homenaxe a esta figura pioneira do cinema en Galicia.

Pola súa banda, o ciclo 'Esenciais: Eric Rohmer' ofrece oito títulos do cineasta e crítico francés restaurados con motivo do centenario do que foi o máis antigo membro da Nouvelle Vague e editor da publicación Cahiers du Cinema, entre elas 'A miña noite con Maud' ou 'O xeonllo de Clara'.

Así mesmo, o ciclo 'Jean-Claude Rousseau: A luz reflectida a través das cousas' representa a primeira mostra integral das películas en Super-8 do cineasta francés, con cinco filmes nos que asimilou con radicalidade as propiedades do formato para imprimir unha sensualidade ascética á filmación, a sonorización e a ensamblaxe dos seus cartuchos Kodachrome.

XIX edición dos Premios Mestre Mateo, no Teatro Colón da Coruña.. CONCELLO DA CORUÑA