O Tribunal Supremo terá 5 días para resolver os recursos das CCAA sobre as medidas contra a pandemia
Nove ministerios traballaron neste decreto que foi aprobado este martes.
Por Europa Press / Redacción | MADRID | 04/05/2021 | Actualizada ás 14:04
A vicepresidenta primeira do Goberno, Carmen Calvo, anunciou hoxe que o Tribunal Supremo terá 5 días para resolver os recursos que expoñan as comunidades autónomas sobre as medidas que adopten contra a pandemia.
Así o explicou na roda posterior ao Consello de Ministros, despois de que o Executivo aprobase este martes un decreto, no que traballaron 9 ministerios, e polo que ademais se prorrogan o medidas socio económicas durante tres meses máis, ata o 9 de agosto, tras decaer o estado de alarma o próximo 9 de maio.
Carmen Calvo explicou que este decreto prevé que as autonomías poidan recorrer ao Tribunal Supremo as decisións que adopten os tribunais superiores de Xustiza das autonomías, co obxectivo de que sexa o alto tribunal quen unifique doutrina sobre as medidas que poidan adoptar as rexións para loitar contra a pandemia.
Será a sala terceira do Tribunal Supremo a encargada de resolver e terao que facer tras a presentación dun recurso de casación. Para iso só terán 5 días de prazo. Esta é unha das novidades que se inclúen no decreto do Goberno xa que os recursos de casación ante o Supremo adoitan tardar moito tempo en ser resoltos.
"Modificamos que, para que todas as CCAA poidan propor o mesmo para protexer aos cidadáns e se nun momento hai unha discrepancia, que o Tribunal Supremo unifique e decida por todos e para todos", precisou Carmen Calvo, quen non considera que sexa necesario reforzar con máis efectivos esta Sala Terceira. Ademais, precisou que o Tribunal Supremo era coñecedor da medida que hoxe aprobou o Executivo de Pedro Sánchez.
