Por Europa Press / Redacción | Santiago de Compostela | 05/05/2021 | Actualizada ás 15:31
Os tres grupos con representación na Cámara galega, PPdeG, BNG e PSdeG, aprobaron, por unanimidade, instar á Xunta a defender a incoación de maneira urxente do procedemento para incluír no BIC Torres de Meirás os bens mobles que formen "parte inseparable" do inmoble pola súa vinculación con el.
A iniciativa aprobada, presentada polo BNG, que aceptou unha emenda do PPdeG, na Comisión Institucional, de Administración Xeral, Xustiza e Interior, tamén chama ao Goberno galego a defender a aplicación provisional do réxime de protección previsto para bens de interese cultural a estes mobles.
Así mesmo, o Parlamento galego pediu á Xunta demandar ao Estado a interposición das "accións xudiciais pertinentes" para defender a titularidade pública dos bens mobles "necesarios para explicar a historia" do BIC, que "son parte integrante e inseparable do conxunto" e cuxa titularidade ou dominio é de carácter público. Ademais, reclamou que o Executivo galego actúe como coadxuvante nos procedementos xudiciais interpostos pola Administración Xeral do Estado.
A Cámara tamén demandou a colaboración do Goberno e a Xunta na adopción de "todas as medidas previstas na lexislación" para "garantir a unidade e a integridade dos bens mobles que forman parte do BIC Torres de Meirás, así como "para impedir un novo saqueo de bens que foron resultado do espolio franquista". Nese sentido, a iniciativa aprobada sinala a necesidade de que o Goberno galego advirta aos descendentes do ditador da "imposibilidade de sacar de Meirás todos aqueles bens que non sexan os obxectos e utensilios de uso estritamente persoal e privado".
Adicionalmente, o Parlamento urxiu á Xunta a levar a cabo as accións pertinentes para que os bens declarados como de interese cultural, as Estatuas do Mestre Mateo e a Biblioteca de Emilia Pardo Bazán, "se manteñan en Galicia", en resposta "ao sentimento xeneralizado da sociedade galega".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.