Por E.P. | A CORUÑA | 05/05/2021 | Actualizada ás 18:54
O Concello da Coruña presentará un recurso contra a dilixencia xudicial sobre o pazo de Meirás que permite ao Franco a retirada de bens do seu interior, segundo informa. Ademais, a rexedora, Inés Rey, apunta que colaborarán coa Avogacía do Estado "en todo o que faga falta e coa documentación pertinente que certifique que o patrimonio interior do pazo pertence, igual que o edificio, a todas e todos os galegos".
A alcaldesa traslada o respecto ás posicións procesuais "de todas as partes", pero incide no "compromiso firme" do concello en relación ao pazo de Meirás. Ao fío diso, argumenta que está constatado que "os Franco usurparon no seu momento unha propiedade pública coa lexitimidade dun réxime autoritario e que esa propiedade conta hoxe en día con obxectos de gran valor", entre as que alude, en particular, á biblioteca de Emilia Pardo Bazán e as estatuas do Mestre Mateo.
En concreto, o Xulgado de Primeira Instancia número 1 da Coruña acordou conceder á familia Franco o prazo dun mes para a retirada "das cousas, bens ou obxectos" que hai no interior do pazo de Meirás, coa excepción daquelas que eventualmente se atopen nel por ser colocadas polo Estado tras tomar posesión do inmoble.
A letrada da Administración de Xustiza, na dilixencia de ordenación, contra a que cabe presentar recurso de reposición, requiriu tamén ao Estado para que permita o acceso ao pazo dos profesionais que designe a familia Franco para poder efectuar a retirada dos bens. A decisión adoptouna despois de que a Audiencia Provincial da Coruña fallase a favor da familia do ditador na súa demanda a este respecto ao revogar o depósito mobiliario a favor do Estado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.