Gonzalo Caballero pide estudar que a hostalaría abra "ata medianoite" tras o fin do estado de alarma
"Se os restaurantes abren ata as 23,00 horas, tamén as cafetarías e os bares poden abrir ata esa hora cos mecanismos e as medidas de seguridade necesarias", manifestou o secretario xeral do PSdeG.
Por E.P. | PONTEVEDRA | 05/05/2021 | Actualizada ás 20:17
O secretario xeral do PSdeG, Gonzalo Caballero, pediu á Xunta e ao Comité Clínico que analicen a posibilidade de que toda a hostalaría poida traballar "ata medianoite", "con todos os mecanismos de seguridade e protocolos", tras o levantamento do estado de alarma o vindeiro domingo.
Nunha visita a Ponteareas, o xefe de filas dos socialistas avogou por "avanzar cara a un modelo" como o que se está aplicando en Asturias, comunidade na que se expón abrir a hostalaría ata as 1,00 horas da madrugada.
"É necesario avanzar na desescalada, se os restaurantes abren ata as 23,00 horas, tamén as cafetarías e os bares poden abrir ata esa hora cos mecanismos e as medidas de seguridade necesarias", manifestou.
Na súa intervención, Gonzalo Caballero avogou por posibilitar a reactivación económica onde non existan tantos riscos e a medida que a vacinación avance. "Hai que apostar por unha liña de reactivación económica cando moitos cidadáns non chegan a finais de mes: traballadores, desempregados, autónomos e pemes atópanse en circunstancias moi complexas", sinalou.
Nesta liña, destacou que o PSdeG traballa desde o Parlamento de Galicia para impulsar "liñas de acción" que permitan dar axudas directas ás economías con dificultades, medidas de protección social que beneficien aos galegos e galegas, e tamén en como empregar os fondos para xerar emprego.
ESTADO DE ALARMA
En canto ao estado de alarma, pediu a Feijóo que "coopere e colabore con lealdade co Goberno de España, "no canto de buscar tensionar". "A mellor garantía para a desescalada é o proceso de vacinación", incidiu Caballero, tras lembrar que Feijóo dicía que "non habería vacúas ata o segundo trimestre de 2021". "A vacinación contra a covid empezou o 1 de xaneiro e realizouse, de forma continúa, grazas ao programa de vacinación do Goberno de España", subliñou.
Nesta liña, instou ao Partido Popular a pronunciarse sobre unha posible prórroga do estado de alarma. "Se nalgún momento o Consello Interterritorial ou as autoridades sanitarias recomendan decretar o estado de alarma para o país ou para unha comunidade autónoma, gustaríame saber se o PP estaría disposto a apoiar este tipo de medidas", sinalou.
PONTEAREAS
En canto á situación de Ponteareas, Gonzalo Caballero puxo en valor que o Goberno de España estea a traballar "con firmeza nun proceso de reforma da seguridade viaira da N-120", así como nunha variante para Ponteareas que permita un acceso directo á autovía A-52, e reducir tráfico noutras vías do concello.
"Falei directamente co ministro de Transportes, José Luís Ábalos, sobre as necesidades de Ponteareas", resaltou o dirixente socialista, que destacou o papel do Goberno central, xa que nestes compromisos non se avanzou "nada" ata que chegou o goberno de Pedro Sánchez.
En canto aos cambios no goberno local de Ponteareas, Gonzalo Caballero puxo en valor o traballo feito polo goberno municipal e trasladoulle o seu "aprecio persoal" e apoio a quen foi ata agora alcalde, Xosé Represas, a quen desexou "o mellor".
"Seguiremos sendo socios leais para seguir traballando en Ponteareas desde o goberno coa candidata que o BNG presente á Alcaldía", sinalou para asegurar que os edís socialistas deste municipio "seguirán dando o mellor de si mesmos para sacar adiante o concello".
