Galicia vacinou case ao 80% da poboación de máis de 60 anos
A metade do grupo 60-69 ten polo menos unha dose. Galicia atópase na media das comunidades que é do 79,2 por cento.
Por Europa Press / Redacción | SANTIAGO DE COMPOSTELA | 05/05/2021 | Actualizada ás 21:05
A chegada de remesas masivas de vacinas supuxo un 'acelerón' nos últimos días no proceso de vacinación ou, en palabras da ministra de Sanidade, Carolina Darias, a inmunización "vai como un tiro" en España.
No caso galego, analizando os datos que publica o Ministerio de Sanidade, xa recibiu polo menos unha dose de vacina o 79,1 por cento dos maiores de 60 anos e o 37,5 por cento completou a pauta; mentres que a metade do colectivo de entre 60 e 69 anos (no que se centra agora a fase de inmunización) xa recibiu polo menos unha dose.
Nos próximos días estas cifras vanse a completar, posto que, co grupo de máis de 80 anos como obxectivo xa culminado, estenderanse as segundas doses ao grupo etario de 70 a 79 anos.
Ademais, este fin de semana haberá unha vacinación masiva para o grupo de entre 65 a 69 anos, que co novo criterio aprobado recibirá a vacina de Pfizer --ata agora planificouse a de Astrazeneca-- e chegarase así ao 70 por cento da inmunización deste grupo de idade coas 90.000 doses que se prevén administrar.
O obxectivo da Xunta é ter a mediados de xuño a todos os maiores de 60 anos coa pauta vacunal completa e, de feito, vincula medidas como a reapertura do lecer nocturno a contar coa poboación de maior risco xa inmunizada.
DATOS
Os datos do Ministerio de Sanidade fan referencia á xornada deste martes 4 de maio --igual que os actualizados pola Xunta na mañá deste mércores, con apenas unhas horas de diferenza no peche de información--.
Con esta información dispoñible, Galicia vacinou ao 79,1 por cento dos maiores de 80 anos, é dicir, a 689.280 persoas sobre o total a vacinar de 870.991 cidadáns (a Consellería de Sanidade só indica na súa web o número de persoas vacinadas por franxa de idade, sen porcentaxes e sen apuntar a cifra que debe de ser inmunizada). Con este dato, Galicia atópase na media das comunidades que é do 79,2 por cento.
O 16,6% ESTÁ VACINADA
As persoas coa pauta completa vacunal fronte á covid-19 alcanzan o 16,6 por cento da poboación diana a recibir a vacina en Galicia, un total de 392.878, tras ser administradas un 85,2% das doses recibidas.
Concretamente, en Galicia foron que foron administradas 1.244.034 dose, máis do 85,2% das 1.460.045 recibidas --con datos da Xunta, lixeiramente máis actualizados que os do Ministerio (que se envían antes do peche da xornada). Deste xeito, cos datos deste mércores (referidos ao martes) puxéronse 43.169 máis que o día anterior.
