A Xunta nega que busque facer "negocio" coa súa proposta de compra de parte dos peiraos da Coruña

A conselleira de Infraestruturas e Mobilidade, Ethel Vázquez, manifestou que a Xunta non expuxo a súa proposta de adquirir o 51% dos peiraos de Calvo Sotelo e Batería para "facer negocios".

A  conselleira afirmou que non son "unha inmobiliaria" e defendeu que traballan ao "servizo dos cidadáns" coa intención de que estes gocen dos terreos.

Vázquez preguntou, ademais, ao Concello da Coruña "se quere que a Xunta retire os 20 millóns de euros para manter a titularidade pública dos terreos". Tamén expuxo se sería o propio Concello o que porá a contía necesaria para facerse cos mesmos.

Doutra banda, asegurou que "non entende" a polémica coa alcaldesa herculina e apuntou que esta é a primeira vez que alguén rexeita 20 millóns de euros para que a fachada do porto "sexa dos cidadáns".

Por último comparou a situación coas discrepancias que xa tiveron Xunta e Concello coas obras de ampliación do complexo hospitalario universitario da Coruña (Chuac), que se atrasaron, dixo, oito meses "por un bloqueo" do concello.