Por E.P. | SANTIAGO DE COMPOSTELA | 07/05/2021 | Actualizada ás 12:40
A portavoz nacional do BNG, Ana Pontón, dirixiuse á conselleira de Emprego e Igualdade, María Jesús Lorenzana, para afirmar que "se quere gañar o seu salario ten unha ocasión de ouro para facelo apoiando a estas traballadoras", as do sector da limpeza da provincia da Coruña, en plenas reivindicacións para demandar melloras nas súas condicións laborais.
Representantes deste colectivo, integrado por case 10.000 persoas, a maioría mulleres, reuníronse este venres co BNG e co PSdeG no Parlamento galego, a uns días de protagonizar outras dúas xornadas de folga, os próximos 11 e 12 de maio. Reclaman, en concreto, unha subida salarial do 1,5% para 2020 e do 2,5% para 2021 no marco da negociación do convenio colectivo.
"A Xunta ten capacidade de presión directa, entre outras razóns porque a maioría dos contratos proveñen da administración pública", afirmou a líder nacionalista en rolda de prensa despois de manter un encontro con estes traballadores. "En teoría hai unha Consellería de Igualdade e Traballo. Se a conselleira quere gañarse o seu salario ten unha ocasión de ouro para facelo apoiando a estas traballadoras", aseverou.
Mostrando o "total apoio" do Bloque ás súas demandas, Pontón subliñou que é "un colectivo que fai un labor esencial pero que lamentablemente non ten a valoración que merece", coa "certeza de que detrás desta infravaloración está unha discriminación de xénero". Nos últimos 14 meses de pandemia sanitaria, estas traballadoras mostráronse "imprescindibles para saír adiante" e "deron o mellor de si para manternos a salvo" a saúde pública, incidiu. "E fixérono", segundo engadiu, "cunha sobrecarga física e emocional importante".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.