Por Europa Press / Redacción | Santiago de Compostela | 07/05/2021 | Actualizada ás 13:13
A Executiva de Podemos acordou acelerar ao máximo a celebración da cuarta Asemblea Cidadá para relevar ao ata agora líder da formación, Pablo Iglesias, que arrincará este mesmo mes e concluirá coas votacións da militancia entre o 6 e o 12 de xuño.
Por tanto, o máximo órgano da formación concluirá o 13 de xuño coa publicación dos resultados para designar ao novo secretario xeral, posto ao que optará a ministra de Dereitos Sociais Ione Belarra, e a dirección que lle acompañará esta nova etapa. O Consello de Coordinación en funcións aprobou nunha reunión celebrada esta mañá o calendario de Vistalegre IV, que publicará en detalle a semana que vén na súa páxina web, xunto ao regulamento e o protocolo das candidaturas.
O secretario xeral de Podemos Galicia, Antón Gómez-Reino, manifestou que a renovación interna da formación morada, para a que se postulou Ione Belarra, "resolverase" no ámbito "orgánico" e augurou que "será un proceso rápido".
O tamén deputado de Unidas Podemos sinalou que, ademais, "dará certezas", as cales "non só é o que necesita a organización, senón é o que necesita o Goberno e a sociedade".
Na cuestión particular da ministra de Traballo, Yolanda Díaz, e compañeira de candidatura nas pasadas xerais, Gómez-Reino volveu manifestar que Podemos Galicia aspira a que "sexa a candidata e presidenta do Goberno" tras o próximo proceso electoral.
Gómez-Reino destacou que Yolanda Díaz é un "referente" e remarcou a tarefa que está a desenvolver á fronte do Ministerio e agora como vicepresidenta terceira do Executivo que preside Pedro Sánchez, o cal "recolle o apoio unánime máis aló de ideoloxías". "É un referente fundamental", apostilou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.