O BNG pedirá a transferencia á Xunta de inmobles da Sareb para destinalos a vivenda social
A viceportavoz do BNG no Parlamento galego, Olalla Rodil, presentou este sábado en Lugo o inicio da campaña de accións sociais e iniciativas que emprenderá a formación para protestar contra o cobro polo uso das estradas a nivel estatal.
Por E.P. | SANTIAGO DE COMPOSTELA | 08/05/2021 | Actualizada ás 19:57
O deputado do BNG no Congreso, Néstor Rego, rexistrou varias iniciativas na Cámara para instar o Goberno estatal a transferir a Galicia os activos inmobiliarios da Sociedade de Xestión de Activos Procedentes da Reestruturación Bancaria (Sareb) --o chamado 'banco malo-- coa finalidade de destinalos a vivenda social.
A través dun comunicado, a formación nacionalista apunta á "necesidade dun cambio" nas políticas que mobilicen o parque de vivendas baleiras, sobre todo tras a chegada da crise sanitaria e económica da covid-19.
Así, Rego defende a "intervención pública no mercado inmobiliario", porque na situación actual "é máis necesaria que nunca para garantir o acceso igualitario am a vivenda". Non en balde, dá o dato de que, en todo 2019, "só se construiron catro inmobles de protección autonómica", mentres que en 2020 os demandantes de vivenda eran case 15.000.
Mentres tanto, o deputado do Bloque sinala que hai "unha gran cantidade de chan e vivendas baleiras que pertencen, directa ou indirectamente, a entidades financeiras que recibiron inxentes cantidades de fondos públicos para o seu rescate", ademais de que "moitas outras están en mans da Sareb".
Por todo iso, o BNG demanda ao Estado que realice todos os trámites necesarios para transferir á Xunta as 2.735 vivendas en poder do 'banco malo', a maioría nas provincias da Coruña e Pontevedra. Isto permitiría construír "unha bolsa de vivenda pública" en Galicia para "facilitar o acceso á vivenda" á mocidade e a colectivos desfavorecidos.
ACCIÓNS CONTRA O COBRO DE ESTRADAS
Por outra banda, a viceportavoz do BNG no Parlamento galego, Olalla Rodil, presentou este sábado en Lugo o inicio da campaña de accións sociais e iniciativas que emprenderá a formación para protestar contra o cobro polo uso das estradas a nivel estatal.
"No caso de Lugo, o Goberno non pode facer pagar aos veciños por unha serie de infraestruturas que en moitos casos non están acabadas e das que non existe unha alternativa na rede de transporte público", explicou.
Isto provoca que a provincia non conte "con comunicacións dignas" co resto de Galicia "nin por estrada nin por ferrocarril", polo que ve "unha burla" que o Goberno central pretenda "incentivar o uso do transporte público con esta medida".
