Le o poema galego e portugués gañadores dos premios aRi[t]mar 2021

A Escola Oficial de Idiomas de Santiago de Compostela acabou de fechar o proceso de votación dos poemas finalistas do certame aRi[t]mar Galiza e Portugal, onde resultaron gañadoras a artista multidisciplinar galega Rosalía Fernández Rial, polo poema “A reflexión” (Árbores no deserto, Espiral Maior, 2020), e a compositora e música portuguesa Márcia, por “O verão sabe-me bem” (As estradas são para ir, Editorial Planeta, 2020). As seguintes persoas clasificadas foron Francisco Fernández Naval (Galicia) por “Dixeches”, e Alexandra Santos (Portugal), por “As letras do teu nome” e, en terceiro lugar, Arancha Nogueira (Galicia), por “#love” e Samuel F. Pimenta (Portugal) con “Foz”.

Os poemas foron escollidos por votación popular online aberta a todo o público galego e portugués e a participación superou todos os rexistros anteriores, segundo informan as persoas organizadoras do certame. A deste ano resulta, de feito, a máis alta das 6 edicións e de todas as modalidades, o que dá conta da "vitalidade e popularidade da poesía", anotan nun comunicado. Conxuntamente cos resultados na modalidade da música, nesta edición 2021 superáronse os 10 mil votos.

Ademais das comunidades educativas e sociais da Escola Oficial de Idiomas de Santiago de Compostela, participaron tamén as da Facultade de Filoloxía da Universidade de Santiago de Compostela, Instituto de Línguas e Ciências Humanas da Universidade do Minho (Braga), Escola Oficial de Idiomas de Ferrol, Escola Oficial de Idiomas de Lugo, Escola Oficial de Idiomas de Pontevedra, Centro Cultural Portugués de Vigo-Instituto Camões e os centros do Ensino Português pelo Camões na Galiza, e os Centros de Estudos Galegos de máis de 35 universidades do exterior, ben como centros de ensino secundario de fóra de Galicia en que se imparte galego, e o público en xeral.

aRi[t]mar Galiza e Portugal é un proxecto didáctico-cultural, desenvolvido inicialmente pola Escola Oficial de Idiomas de Santiago de Compostela, pertencente á Consellería de Educación, Universidade e Formación Profesional da Xunta de Galicia, que ten por obxectivo divulgar a música e a poesía galego-portuguesas actuais, e achegar a cultura e a lingua dos dous países, no marco do desenvolvemento da Lei Valentín Paz-Andrade para o aproveitamento do ensino do portugués e vínculos coa lusofonía. 

OS POEMAS GAÑADORES

 

A REFLEXIÓN  

 

Detrás do espello

todas eramos a mesma muller,

núa, 

interrogativa,

reclamándolle respostas

á realidade.

Ninguén vai chamar por nós?

Ninguén ─silencio ─.

Porque sodes a mesma muller sen rostro,

sen nome.

E se nos creamos?

Que cada unha

se debuxe da forma que queira.

E foi así como demos a luz

os nosos lenzos,

soñando pincel,

imaxinando cores, 

a grande escala.

Foi así como

comezamos a parirnos…

Ata nacer

entre os marcos ceibes 

da fantasía feminina. 

Así hoxe vexo,

nos seus ollos,

que o teu retrato

son eu.

 

Rosalía Fernández Rial, Árbores no deserto, Galaxia, 2020

 

---

 

O verão sabe-me bem.

Gosto do calor que entra, d

a face quando fica iluminada

gosto de ter luz nos olhos e gosto de ficar parada. 

 

Quando o sono não vem,

e aquelas noites não se arrefecem,

é com o verão que sonho. 

  Aquieta-me, o quente. 

  Nem preciso falar. 

 

Basta ficar a olhar

a linha torta dos montes com o calor dos horizontes

para tudo se endireitar. 

 

Márcia. As estradas são para ir. Editorial Planeta, 2020.