O PSdeG crítica a "inacción" da Xunta: "Ten máis de 1.200 millóns metidos na neveira"
Puy (PPdeG) asegura que é "imposible" que a Xunta non estea a gastar os recursos dos que dispón para combater a pandemia.
Por E.P. | Santiago de Compostela | 10/05/2021 | Actualizada ás 14:45
O secretario xeral do PSdeG, Gonzalo Caballero, criticou a "inacción" da Xunta para a reactivación económica e considerou que "se non é capaz" de xestionar os "1.200 millóns" de euros extraordinarios recibidos debe "poñelos en mans dos actores económicos, das persoas doutras administracións". "Cada día que pasa sen poñer ese diñeiro en funcionamento, en mobilización, en mans das persoas, é unha semana que perdemos para a reactivación", manifestou o xefe de filas dos socialistas galegos nunha rolda de prensa ofrecida este luns na Cámara galega e na que acusou ao Executivo galego de deixar "orfos" aos galegos.
Na súa intervención, o socialista asegurou percibir que a Xunta "carece de acción fronte á crise económica, carece de compromiso e de medidas para a reactivación". "A comisión de reactivación segue nun letargo continuo e a Xunta de Galicia non tomou en todo o que vai deste ano ningunha medida importantes para potenciar os sectores produtivos", afirmou.
Fronte a esta "inacción", Gonzalo Caballero pediu a Feijóo que "inmediatamente poña todos os resortes galegos a actuar para protexer á xente fronte á crise". "En definitiva, que non teñamos o diñeiro metido na neveira da Xunta, senón que os poñamos na actividade da economía para que circule e reactive", apuntou. E é que máximo dirixente do PSdeG advertiu de que "non vale dar unha resposta á maior crise económica fóra de tempo, con meses de atraso, no verán ou outono, cando van máis de cinco meses de penuria económica".
XUNTA "EN LETARGO"
Deste xeito, considerou que o Goberno de Feijóo está "en letargo, inactivo, sen ningún tipo de decisión". "A nosa actitude e actividade vai ser sempre a de construír, a de expor medidas e propostas", afirmou o socialista. Así, lembrou que a súa formación "propuxo un programa de apoio para a reapertura de negocios", "medidas para priorizar os proxectos europeos que teñen que optar aos Next Generation e non hai ningún tipo de resposta".
"Teñen a man tendida para orientar a reactivación económica", incidiu para insistir en que se a Xunta non é capaz de xestionar os fondos cos que conta para facer fronte á pandemia debe poñelos "en circulación". Precisamente, na rolda de prensa tamén dixo que esta semana viaxará a Madrid para reunirse coa vicepresidenta económica Nadia Calviño para falar de cuestións que afectan a Galicia.
RESPOSTA DO PPDEG
Preguntado por estas críticas, o portavoz parlamentario do PPdeG, Pedro Puy, asegurou que é "imposible" que a Xunta non estea a gastar os recursos dos que dispón para combater a pandemia. "Acaba de presentarse na Cámara o peche do exercicio do ano pasado e, a diferenza doutras comunidades, Galicia tivo un déficit do 1%", sostivo Puy, que incidiu en que iso significa que "se gasta un 1% do PIB máis dos ingresos que tivo a comunidade".
"Este argumento que agora emprega o líder autonómico do PSOE, que parece que vén tomado doutro líder máis local, paréceme que é bastante perigoso e que ten un punto de indecencia", asegurou. Así, subliñou que a Xunta "está a facer un gran esforzo, con todos os seus recursos", tanto cos propios como aqueles que recibe do Estado para "loitar contra a pandemia". "Creo que hai certos argumentos que creo que non se deben de empregar en política, dicir isto de que a Xunta está a facer... non se entende moi ben. Está a gastar máis do que ten", subliñou.
