Xa hai data para vacinar ao grupo de 40 a 49 anos
Segundo a Xunta "todo parece indicar" que o proceso irá "máis rápido se cabe" ante este incremento do número de vacinas de 'Pfizer'.
Por Europa Press / Redacción | SANTIAGO DE COMPOSTELA | 14/05/2021 | Actualizada ás 21:20
A Consellería de Sanidade prevé completar o proceso de vacinación do grupo de 50 a 59 anos entre maio e xuño, mes no que arrincaría a inoculación da primeira dose para o seguinte tramo de idade (entre 40 a 49 anos).
O titular de Sanidade, Julio García Comesaña, chamou á "prudencia" ante o anuncio deste xoves do Goberno do Estado relativo á dispoñibilidade dun maior número de dose de 'Pfizer' das esperadas, aínda que recoñeceu que a noticia permite abordar con certo "optimismo" as próximas semanas do plan de vacinación.
En concreto, Sanidade conta cunha estimación de 150.000 vacinas desa marca á semana durante o mes de xuño, o que suporía entre o 5,3 e o 5,5 por cento do total que recibe España e que se corresponderían á porcentaxe de poboación que ten a comunidade na dita franxa de idade.
En declaracións aos medios este venres, Comesaña apelou á "prudencia" ante os antecedentes de "grandes noticias" que, por diversos motivos, "non se cumpren". Entre eles, mencionou o recente caso de 'Janssen' que "por un problema na fábrica" non están a chegar, ou o "xa coñecido de 'AstraZeneca', que está "a limitar" e "atando" toda a planificación das segundas doses.
En todo caso, recoñeceu que a planificación do proceso e a dispoñibilidade dun maior número de unidades das esperadas permite dicir "con certo optimismo" que Galicia poderá completar o grupo de entre 50 e 59 anos "con dúas doses" entre os meses de maio e xuño.
Neste sentido, "todo parece indicar" que o proceso irá "máis rápido se cabe" ante este incremento do número de vacinas de 'Pfizer', polo que "é bastante probable" que Sanidade poida empezar co grupo de 40 a 49 anos "antes do previsto", no propio mes de xuño.
