Dous detidos na Coruña por estafa na creación dunha empresa especializada na loita contra a covid-19

A Policía Nacional detivo dous homes e imputou un terceiro por un suposto delito de estafa a dous empresarios aos que fixeron crer que ían participar na creación dunha empresa especializada na loita contra o Covid-19.

Segundo informou a Policía Nacional, os feitos producíronse en agosto do ano 2020 cando os dous homes convenceron a dous empresarios para formalizar a creación dunha empresa especializada na loita contra o Covid-19, que se dedicaría "á fabricación e distribución dun arco nebulizante que utilizaría un produto desinfectante do que os prexudicados serían os seus distribuidores exclusivos", engade.

Para iso, expuxéronlles a necesidade de adiantar o importe total de 200.000 euros que sería achegado a partes iguais por cada un dos partícipes, apunta a Policía.

Os investigados fixeron ver aos prexudicados que tiñan o contrato de exclusividade no país para distribuír o produto, de orixe italiana. As mesmas fontes indicaron que depositaran avais en calidade de fianza por un importe de 750.000 euros para a súa distribución en España, e que xa compraran produtos relacionados a unha empresa valenciana por valor de 20.000 euros.

Tamén mostraron ás vítimas unha conta bancaria en Xibraltar na que tiñan supostamente un capital de 20 millóns de euros, "co fin de dar veracidade á súa solvencia como empresarios", puntualiza a Policía.

"Os autores usarían para a fabricación do arco nebulizante unha empresa propiedade dun deles, para posteriormente recorrer a outra empresa coruñesa para a fabricación dunha máquina nebulizadora", relatou a Policía.

O montante do estafado ás vítimas ascendeu a unha cantidade aproximada duns 100.000 euros. Ambos os detidos, de 55 e 66 anos de idade, xa participaran anteriormente noutras tentativas fraudulentas de compra de empresas en Galicia.