O vicepresidente Rueda, "seguro" de que Galicia baterá en 2022 a marca de 5 millóns de turistas

O vicepresidente da Xunta, Alfonso Rueda, confiou na recuperación para o próximo ano dos indicadores de turismo internacional en Galicia, que permitirán "seguro" bater a marca de cinco millóns de turistas de 2019.

Nunha entrevista á Televisión de Galicia, o responsable da carteira de turismo afirmou que hai "optimismo" entre o sector de cara a este verán, algo que confirman os datos desta última ponte, mesmo "cando a meteoroloxía non acompañou".

"Vese ese impulso, as ganas que ten a xente de viaxar", apuntou Rueda, que defendeu que, tras meses "tan difíciles", con peches e restricións, o obxectivo da Xunta foi sempre chegar en boas condicións para o verán e a tempada alta.

No entanto, lembrou que o turismo se irá "recuperando a modo" e o Goberno galego ten como obxectivo para este verán o estatal, "aproveitando o segundo ano do bienio Xacobeo para o turismo internacional".

Galicia presentará estes días a súa oferta turística na Feira Internacional de Turismo de Madrid, Fitur, onde, ademais da calidade, promocionará a "seguridade" como destino.

Entre outros elementos, Alfonso Rueda incidiu no seguro coronavirus, que entrará en vigor o 1 de xuño para dar cobertura aos posibles desaxustes e problemas que poidan sufrir os turistas que pasen a noite en Galicia por mor da pandemia --corentenas, gastos imprevistos, repatriacións...--.

Paralelamente, pediu ás autoridades estatais que se "aceleren" sistemas como o pasaporte covid para as persoas vacinadas, de modo que este grupo se poida desprazar con maior facilidade, non só a nivel estatal, se non tamén internacional.