Por E.P. | SANTIAGO DE COMPOSTELA | 19/05/2021 | Actualizada ás 20:23
O vicepresidente primeiro da Xunta, Alfonso Rueda, destacou o papel dos guías turísticos como embaixadores de Galicia como destino seguro e de calidade neste Xacobeo durante o acto 'Deixáte guiar nos Camiños', organizado pola Asociación Profesional de Guías de Turismo de Galicia (Apit Galicia) en Fitur.
Diso informou a Xunta nun comunicado, no que lembra que, co obxectivo de reactivar este sector e fomentar os produtos turísticos vinculados ao Camiño de Santiago e ao Xacobeo, o Executivo galego investiu 170.000 euros nun convenio de colaboración con este colectivo.
O acordo inclúe medidas como financiamento de ata o 50% do custo de visitas guiadas en localidades das distintas rutas xacobeas, un concurso de ideas para crear novos produtos turísticos nestes municipios, e a posta en marcha da ferramenta informática 'Descobre vos Camiños' que agrupa todas as actividades levadas a cabo por estes profesionais nestes concellos.
Ademais, conta con iniciativas dirixidas a mellorar a profesionalización dos guías turísticos, incrementando a súa capacitación e competitividade a través da formación en áreas como as novas tecnoloxías ou o turismo sustentable. Esta formación súmase á que xa recibiron durante a pandemia en materia de seguridade sanitaria, ademais da colaboración para crear novos produtos no escenario postcovid-19.
A axuda a estes profesionais tamén está presente no plan de choque para o sector, que conta con axudas directas de 3,6 millóns de euros a axencias de viaxes e operadores de turismo, así como medidas de fomento do consumo a través da renovación dos programas Elixe Galicia e a Tarxeta Bono Turístico #QuedamosenGalicia.
O plan tamén contempla 1,4 millóns para o seguro coronavirus, que se porá en marcha en menos de tres semanas para ofrecer un "plus de tranquilidade e confianza" aos turistas e peregrinos ao cubrir os seus gastos ante un caso de infección por covid-19 ou corentenas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.