Ramón Sarmiento renuncia á reelección como secretario xeral de CC.OO. en Galicia por "perda de apoios"

O secretario xeral saínte de CC.OO. Galicia, Ramón Sarmiento, renunciou á reelección como líder da organización na Comunidade galega, un cargo ao que aspira a exsecretaria xeral do sindicato en Vigo, Amelia Pérez, que poderá converterse na primeira muller en liderar un sindicato en Galicia.

Aínda que o aínda responsable de CC.OO. en Galicia atendeu aos medios como candidato no arranque do XII Congreso que a organización sindical celebra este xoves en Santiago de Compostela, durante a súa intervención no plenario decidiu presentar a súa renuncia.

"Na medida que puiden fun un activo para a organización, pero tamén tedes o meu compromiso de que non vou ser un estorbo", dixo ao finalizar a súa intervención de defensa do informe da secretaría xeral. "Ramón Sarmiento vai para a súa empresa", asegurou.
Pola súa banda, fontes da organización explicaron a Europa Press que Sarmiento tomou esta decisión tras detectar unha perda de apoios para revalidar o cargo.

PRIMEIRA MULLER EN LIDERAR CC.OO. GALICIA

Tamén en declaracións aos xornalistas, Amelia Pérez explicou que "ao longo dos últimos meses" houbo "varias organizacións" no seo do sindicato que lle propuxeron encabezar unha candidatura alternativa. "Valoreino e, ao final, cando parte dunha organización pídeche dar un paso adiante, o compromiso e a militancia lévanche a afrontar estas decisións", sinalou.

A sindicalista destacou que "afronta con alegría e ilusión" este "reto importante". "Se ao final todo sae ben, serei a primeira muller en dirixir o sindicato en Galicia e creo que sería un fito importante para Comisións Obreiras", apuntou.

Entre os retos que visualizou de cara ao futuro, situou a "saída da crise" que "empezou sendo sanitaria" para converterse en "económica e social". "Hai desafíos importantes enriba da mesa, con cambios de ciclos produtivas e CC.OO. vai seguir facendo o que fixo ata agora: seguir defendendo os intereses de clase como ata agora, con ese binomio de mobilización e negociación que é imprescindible seguir tendo", afirmou.

Tras incidir en que a organización "non renunciará a seguir estando na rúa", asegurou tamén que queren formar parte do "proceso de cambio que se vai a producir neste país". "Como organización sociopolítica tamén temos moito que dicir", sinalou.

En concreto, Amelia Pérez Álvarez (Moaña, 1970) leva máis de dúas décadas afiliada a Comisións Obreiras, desde 1998. Traballadora do comercio, é delegada sindical en Zara en Vigo desde 1999. Durante varios anos foi secretaria de organización da unión comarcal de CC.OO. de Vigo e o últimos oito foi a súa secretaria xeral, primeira muller en asumir esta responsabilidade.

COMPROMISO REFORMA LABORAL

O secretario xeral saínte de CC.OO. Galicia, Ramón Sarmiento, apuntou tamén a que haberá "confrontación" se "non se cumpre" un "compromiso tan cacareado" polo Goberno central como a derrogación da reforma laboral.

Preguntado polos medios de comunicación polas diferenzas no Executivo estatal sobre este asunto, Ramón Sarmiento asegurou que este sería un "elemento que obrigaría a CC.OO. a entrar nun espazo de confrontación se non se cumpre". "Nalgún momento ten que formar parte do Boletín Oficial do Estado (BOE)", sostivo.

Sarmiento asegurou que hai "aspectos lesivos" nesta reforma que "hai que modificar". "Hai que recuperar elementos e capacidades para intervir no mercado laboral dos que hoxe carecemos, como a autorización preceptiva que antes había para autorizar a extinción de despedimentos ou o peche dunha empresa", afirmou.

"Hai que empoderar de novo a capacidade colectiva de negociación dos traballadores", apuntou para restar importancia ás "diferenzas" que poida haber no seo do Goberno tendo en conta que, conforme lembrou, a propia ministra de Economía, Nadia Calviño, tamén asegurou "hai unha semana" en Galicia que o seu desexo era modificar este texto "antes de finalizar o ano".