Vinte menores de Ceuta serán acollidos en Galicia pero Feijóo critica a repartición: "Imos ter os mesmos que Madrid"
O presidente da Xunta subliñou que Galicia adoptou a decisión de aceptar a "todos" os menores que propuxo o Goberno.
Por E.P. | SANTIAGO DE COMPOSTELA | 20/05/2021 | Actualizada ás 16:33
Galicia acollerá a 20 menores procedentes de Ceuta do total dos 200 que xa se atopaban na cidade antes da crise e para cuxo aloxamento recorreu o Goberno ás comunidades co fin de evitar unha masificación. Con todo, o presidente galego, Alberto Núñez Feijóo, queixouse dos criterios de repartición: "Imos ter os mesmos que a Comunidade de Madrid".
"Discrepamos da repartición e duns criterios, unha vez máis, inventados; e discrepamos dos efectos chamada que realizou o Goberno estes anos e de determinadas consideracións na xestión da crise", dixo o presidente galego, quie puxo o acento en que Galicia acollerá o mesmo número de menores que a Comunidade de Madrid a pesar de ter un número de habitantes moi inferior. En todo caso, na rolda de prensa posterior á reunión semanal do seu Executivo, Feijóo precisou que "unha cousa é discrepar" dos criterios de repartición e outra, "romper a unidade".
Así, subliñou que Galicia adoptou a decisión de aceptar a "todos" os menores que propuxo o Goberno. "Somos un pobo solidario que, durante décadas, tivo que emigrar", exemplificou o presidente galego, antes de engadir que, ademais, está a falarse de menores, polo que a decisión da Xunta tamén se asenta en "razóns de xustiza social e humanitarias".
