Por E.P. | SANTIAGO DE COMPOSTELA | 21/05/2021 | Actualizada ás 13:46
O alcalde de Santiago, Xosé Sánchez Bugallo, destacou que observa con "optimismo" a "estabilización" dos novos casos de covid-19 detectados na cidade, pero fixo un chamamento á prudencia ante as festas celebradas en pisos.
Nunha rolda de prensa celebrada este venres na capital galega, o rexedor explicou que os datos rexistrados na cidade "inducen a un moderado optimismo en relación á evolución da pandemia".
De feito, puxo o foco en que, mentres hai uns días "estaba a subir o número de casos diagnosticados", volveuse a iniciar "o camiño de estabilización" mediante unha baixada da incidencia acumulada de novos casos diagnosticados por cada 100.000 habitantes no últimos sete días, que se sitúa en 31.
No entanto, o alcalde remarcou que resulta "extremadamente importante manter medidas de seguridade" e advertiu de que o crecemento de casos "parece gardar relación" coa celebración de festas en pisos.
Por iso, Bugallo incidiu na necesidade de que a poboación máis nova, que non foi vacinada, "sexa consciente dos efectos secundarios da enfermidade". "A mortalidade está drasticamente reducida, pero hai outros efectos secundarios que poden condicionar a vida de persoas máis novas", advertiu.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.