O PP rexeita unha proposta do BNG para que o Monumento aos Mártires de Carral sexa Ben de Interese Cultural
Tamén denega que se recoñeza como BIC o xacemento de Castro Valente, tal e como pedía o PSdeG
Por Europa Press / Redacción | Santiago de Compostela | 21/05/2021 | Actualizada ás 16:36
O PPdeG rexeitou unha proposta do BNG --apoiada polo PSdeG-- para instar á Xunta a incoar o expediente de Ben de Interese Cultural (BIC) para o Monumento aos Mártires de Carral, situado neste concello coruñés.
Durante o debate na comisión de Cultura do Parlamento galego, o deputado do PP José Luís Ferro defendeu a negativa do seu grupo en que ser catalogado como BIC "podería supor un incremento da súa consideración, pero non da súa protección".
E é que o PP sostén que a súa protección "xa está garantida, xa que está incluído no Catálogo de Patrimonio Cultural de Galicia desde o ano 1993 e está incluído no Plan Básico Autonómico".
Respecto diso, Mercedes Queixas (BNG) reprochou aos populares que se opoñan a esta declaración BIC a pesar de recoñecer que o monumento cumpre con todos os requisitos. Así, subliña que representa unha "páxina viva da historia colectiva galega".
Destaca que o monumento lembra o levantamento liberal progresista encabezado polo capitán xeral Miguel Solís contra o goberno reaccionario de Narváez, promotor de "recortes de dereitos e liberdades". As tropas sublevadas contra o réxime foron derrotadas na batalla de Cacheiras, o 23 de abril de 1846.
Igualmente, o PP denegou unha iniciativa socialista --apoiada polo Bloque-- que buscaba recoñecer como BIC o xacemento arqueolóxico de Castro Valente, situado entre Padrón e A Estrada.
Sobre esta cuestión, Noa Díaz (PSdeG) urxiu á Xunta a que protexa este ben, posto que "corre serio risco de afectación polas posibles obras de construción dun parque eólico".
