Por admin | SANTIAGO DE COMPOSTELA | 25/05/2021
Cos 84 agasallos
Amigávéis,
Pracenteiros,
Variados,
Agradecidos,
Eu quixera
agasallar
aos meus irmáns
da Galiza
benqueridos.
Aos que con amor
e ledicia
na vida
sempre, sempre,
noite e día,
me acompañan
sen medida
A miña razón vital
E as riquezas da miña vida
son horas de clarexar.
Oitenta e catro cumpridos.
E chega a hora de testar.
Sen tardar!
Mentres conserve os sentidos.
Sen enredos mentireiros,
De toda a miña herdanza
Quero declarar moi gozoso
O legado de máis honra:
A FALA DOS DEVANCEIROS.
De toda a nosa facenda
O meirande capital
sempre será da Galiza
o patrimonio espiritual.
Eu así volo transmito.
Axudei a facela grande.
Coidei dela con fachenda
Tentei facela presente
De palabra e por escrito.
E agora,
aínda con un gran despexo,
con moito e sumo respecto,
sen pretender amolarvos,
ouso expresar un desexo:
En todo tempo e lugar,
Sen xenreiras,
sen enfermizos
complexos
Que nos sintamos honrados
De estudar e usar a lingua
E gozar dos seus feitizos.
Pois daquela!
Canta sorte!
Canta honra!
Abofé!:
Outros oitenta e catro anos
nun povo normalizado,
en convivencia gozosa,
con decisión e afouteza,
sen fanatismos arcaicos,
inútiles e desfasados,
saibamos todos concordes
en amigável consenso
con moito amor polo noso
defender este legado,
con asertividade e firmeza
con confianza e con fe.
A decisión está ben pensada
E é segura.
Hoxe renovo o meu voto:
84 novas fidelidades
e agradecementos
para a nosa lingua e cultura
galegas.
Ben esperto!
Non a cegas!
Cant’é!
Sexa así, pois!
Xaquín Campo Freire, 20-05-2021.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.