Adega pide investigar "a fondo" a contaminación no Eume para ver se Endesa incorreu en delitos ambientais

A compañía vén de recibir unha multa millonaria da Xunta por desobedecer á administración autonómica e provocar un dos episodios de contaminación máis virulentos que se lembran na zona.

Por Galicia Confidencial | SANTIAGO DE COMPOSTELA | 27/05/2021 | Actualizada ás 22:20

Comparte esta noticia

O ecoloxismo galego tivo días atrás unha xornada de celebración cando a Xunta de Galicia fixo pública a súa proposta de sanción contra Endesa por ter contaminado a auga do río Eume entre agosto e outubro do ano pasado. A multa, contra a que a empresa xa anunciou recurso, ascendería a 1’8 millóns de euros, unha sanción aplaudida polo movemento verde de Galicia; que, porén, esixe investigar máis a fondo a cuestión para delimitar posibles infraccións legais. 

Instalación de barreiras no río Eume, onde verteduras obrigaron a prohibir o consumo de auga en Pontedeume.. XUNTA
Instalación de barreiras no río Eume, onde verteduras obrigaron a prohibir o consumo de auga en Pontedeume.. XUNTA

Esa é a petición de ADEGA-Ferrolterra, que acusa á empresa de “neglixencia” na xestión das augas do encoro da Capela; e que, segundo a Xunta, a empresa decidiu abrir para producir electricidade a sabendas de que contiña metais pesados. Segundo a formación ecoloxista, a resolución do expediente administrativo “non resolve a problemática de fondo nin evita que se volvan repetir sucesos contaminantes”.

Esta problemática viría definida porque, de acordo coa plataforma, a investigación debería ir máis alá e analizar “a fondo” as causas que provocaron esa turbidez do Eume. O obxectivo sería delimita se existen ou non motivos que poidan derivar nunha causa penal contra a empresa; que, segundo o informe, decidiu abrir as augas a pesar das advertencias negativas da Xunta.

ELIMINAR A "CONCESIÓN FRANQUISTA"

ADEGA critica a resolución en tanto que, segundo subliñan, “tampouco se determinan as accións e medidas que debería tomar Endesa para que o río Eume e o Parque Natural non teñan que sufrir novos sucesos de contaminación” por mor deste “mal estado e a mala xestión do encoro da Capela”. A solución pasaría por obrigar á empresa a retirar os lodos do encoro “dun xeito ambientalmente apropiado” e logo tratalos, para evitar así “dunha vez por todas” estes episodios de contaminación que a asociación trata como “recorrentes”.

Do mesmo xeito, consideran insuficiente a sanción tendo en conta o longo percorrido das supostas “irregularidades” da compañía no espazo natural das Fragas do Eume: “esta multa non recompensa todo o impacto que Endesa e o encoro da Capela teñen exercido nos últimos 50 anos sobre o río e sobre este espazo natural protexido”. “Xa é momento de declarar caduca a concesión franquista e liberar o Eume de medio século de contaminación incesante”, remachan.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta