O BNG ve a Feijóo empeñado en facer de "comercial de intereses especulativos" cos peiraos da Coruña

A portavoz nacional do BNG, Ana Pontón, reprochou ao presidente da Xunta, Alberto Núñez Feijóo, a súa proposta de adquisición do 51% dos peiraos coruñeses de Calvo Sotelo e Batería e considerou que, con iso, evidencia que está "máis empeñado en facer de comercial de determinados intereses especulativos que en defender os intereses da Coruña".

Xunto a outros militantes do BNG, Ana Pontón fixo un chamamento á cidadanía a participar na manifestación convocada o domingo polo movemento 'Defensa do Común' baixo oa lema 'A Coruña non se vende' para esixir que os peiraos se devolvan á cidade unha vez perdan o uso portuario.

A dirixente nacionalista defendeu que estes terreos do porto son "da cidade, da súa veciñanza" e supoñen unha oportunidade para a "última gran transformación" na mesma. Pontón expuxo tamén que se trata dunha cuestión de "país" e confirmou que ela mesma participará na protesta.

Ademais da licitación da conexión ferroviaria a Punta Langosteira e da condonación da débeda da Autoridade Portuaria, recriminou que do encontro mantido recentemente entre o presidente da Xunta e o ministro de Transportes, José Luís Ábalos, non se concretasen, dixo, estas cuestións. "Houbo moitas gabanzas e titulares de prensa", cuestionou.

En canto á condonación da débeda, preguntouse "por que Valencia si e A Coruña non" e asegurou que o que se necesita é "vontade política" para acabar coa "discriminación" da Coruña e Galicia.

Por outra banda, expuxo para o futuro da fachada marítima coruñesa potenciar a condición do porto como motor económico, cun desenvolvemento vinculado ao mar. "Non ten sentido destinar diñeiro público para uns terreos que xa son públicos", insistiu tamén sobre a proposta do titular do Executivo galego.

ALCALDESA

A alcaldesa da Coruña, Inés Rey, trasladou o respecto do goberno local á protesta convocada para o día 30 por Defensa do Común en contra da venda dos peiraos, ademais de esixir a condonación da débeda da Autoridade Portuaria.

A rexedora reafirmou o traballo do goberno municipal para "sentar a todas as administracións implicadas" para traballar no futuro do porto e para buscar unha solución da débeda.

Inés Rey remitiuse á reunión que se produciu o pasado 23 de febreiro entre as administracións e afirmou que actualmente "se está traballando nas solucións financeiras para a débeda".

"Na licitación do tren a Langosteira e nun novo protocolo redactado polas administracións que sirva para abordar todas estas cuestións", engadiu.