Un total de 124 farmacias da provincia de Ourense dispensan xa kits de test de saliva para detectar o Covid
Por E.P. | SANTIAGO DE COMPOSTELA | 28/05/2021 | Actualizada ás 12:24
Ao longo desta semana 124 das 187 farmacias existentes na provincia de Ourense adheríronse, tras a proba piloto realizada a semana pasada nas boticas de Allariz, á campaña da Xunta destinada a frear a curva de contaxios coa dispensación entre a poboación de kits de test de saliva para detectar o coronavirus SARS-CoV 2.
Este venres o delegado da Xunta en Ourense, Gabriel Alén, achegouse ata unha farmacia na cidade das Burgas para comprobar in situ como funciona o kit. No acto, que se desenvolveu na Farmacia Ana María Pérez Vázquez, situada avenida de Buenos Aires de Ourense, participou tamén o presidente do Colexio oficial de Farmacéuticos de Ourense, Santiago Leis Vence, quen sinalou que esta é a segunda campaña promovida desde o ámbito da farmacia para contribuír a frear o avance do coronavirus.
Xa a finais do ano pasado, tal e como lembrou Leis Vence, as farmacias de seis municipios ourensáns realizaron unha campaña baseada nun procedemento de cribado para a detección de anticorpos fronte a Sars-CoV2, mediante test serológicos rápidos.
Ambas as iniciativas, segundo afirmou Leis Vence, evidencian "o activo papel do colectivo farmacéutico de Ourense na loita contra a Covid-19".
POBOACIÓN DIANA
A poboación diana obxecto desta iniciativa comprende a franxa de idade de 12 a 64 anos e a participación das farmacias será voluntaria. En concreto, esta participación consiste na entrega ao cidadáns obxecto do cribado un kit de autorecollida de mostra de saliva, acompañado de información sobre como debe realizar o paciente a toma da mostra, así como o detalle do procedemento para a súa posterior recollida e envío desde a farmacia, a través da distribución farmacéutica, ao Laboratorio de Microbioloxía da área Sanitaria de Vigo, onde se analizarán as mostras.
No caso de que haxa positivos na proba, o protocolo de actuación pecharíase coa xestión dos casos por parte da Xerencia da área Sanitaria de Ourense, Verín e O Barco de Valdeorras para o seu tratamento.
