PSdeG acusa á Xunta de "brazos caídos" por non usar o diñeiro de Madrid para reactivar a economía
O PP responde a G. Caballero pedíndolle que fale con "os seus compañeiros de Madrid" para que o Goberno devolva os 200 millóns do IVE.
Por E.P. | SANTIAGO DE COMPOSTELA | 31/05/2021 | Actualizada ás 13:44
O secretario xeral do PSdeG, Gonzalo Caballero, acusou á Xunta de permanecer "ausente" e de "brazos caídos" e considerou necesario que poña "en mans de autónomos e pemes" os 234 millóns transferidos polo Goberno central para axudas directas á reactivación.
Nunha rolda de prensa ofrecida este luns na Cámara galega, Gonzalo Caballero lembrou que o Executivo estatal transferiu esa partida "fai tres semanas" á Xunta. Con todo, sostivo que, a día de hoxe, "a Xunta aínda segue sen facer os deberes" e que é necesario que esas partidas se poñan "en mans" dos autónomos e das pemes que necesitan "impulso", "liquidez e ingresos" para afrontar o verán e a desescalda.
"Se o Goberno de España puxo os fondos a disposición das comunidades autónomas, é necesario que Galicia cumpra", afirmou o xefe de filas dos socialistas galegos, que asegurou que "non se pode seguir esperando" mentres a Xunta ten "os brazos caídos".
Por todo iso, incidiu en que o Goberno galego debe traballar con "competencia e capacidade". "Ante a maior crise non podemos seguir estando en mans dunha Xunta que está ausente, que non pon en mans das pemes e os autónomos eses 234 millóns", incidiu.
RESPOSTA DO PPDEG
Sobre este tema tamén se pronunciou este luns a viceportavoz parlamentaria do PPdeG Paula Prado, quen destacou os dous plans de rescate para autónomos postos en marcha ata o momento pola Xunta "por 182 millóns de euros". "E estou segura de que eses fondos do Estado están a destinarse a autónomos e empresas", respondeu, ao ser preguntada polas críticas do líder socialista.
Prado aproveitou para suxerirlle a Gonzalo Caballero que "axudase e falase cos seus compañeiros en Madrid" para acelerar o pago dos máis de 200 millóns de euros que, tal e como constatou o Tribunal Supremo, debe o Estado á Xunta en concepto dunha mensualidade do IVE do 2017.
